Tripura nung ganjadong 35,000 shi raksa endok

Bishalghar (Tripura), November 1 (Agencies) : Tripura nung Bangladesh den arrtsüa aliba tesem nung ganja tedong 35,000 shi ka BSF, police, forest department, excise aser administration puri raksaa endokogo.
October 28, 2015 nunga Sepahijal district kübok Bakshanagar tesem nung ganjadong 75,000 shi raksa endokogo.
BSF Gakulnagar Sector kübok field intelligence team kati osang tejangja angazükba sülen Bangladesh den arrtsüa aliba tesemtem – Konaban aser Kamalasagar nung ganjadongtem raksa endok.
“Küm shia November ita nungi civil administration, police aser BSF nungeri ganja tsünüba raksa endoktsür. Onoki Kamalasagar aser temeket aliba tesem nungi tenzükogo. Onoki ganjatong 35,000 shi raksaogo aser iba jenjangji sen crore 15 shi asütsü” ta Prashun Dey, SDM, Bishalghar-i metetdaktsü.
“Bishalghar aser iba anasa aliba subdivision nungi ganja tsünüba ajak meraksatsü tashi onoki mapa inyaktsü. Parnoki tsünütetba ganjatemji linük tesem balalai miima shibelener” ta paisa ashi.
Sorkar kübok tentet aikati ganja tsünüba anema mapa anema inyaker aser nübor nem angatetdaktsütsü meranger saka iba mapa inyakba manener, kechiyong ganja seret kaji sen 5,000 nungi 7,000 tashi ayoker.
Tripura kübok Sepahijala district nung ozüng alema ganja tsünür aser itemji Bangladesh-i tongti süa shibelener.