Agartala, July 10 (Agencies): Assam nung tzünglu kanga aruba aser tzümetsüng timtemtem ajanga ita asem shi Tripura nung nüngdakba chiyungtsü aser osettsüsettem mongui timtem aru saka tensaji tang tajungba kümogo, ta Deobarnü ketdangsertemi ashi.
Mapang talangka gari lenmang aser rail tesentaktep mejungi liasü saka tang itemji yangluogo, ta ketdangserisa shisem.
Assam kübok Karimganj district nung aliba Assam-Agartala National Highway nung Tripura-i aoba truck gari meyirjang aika ita asem shi anendentsüsa aküm aser iba jagi Tripura sorkari petrol o diesel ayokba maparen nung tetuyuba kar agütsü.
Transport aser Food & Civil supply department temi ashiba agi, oil tankers 68 aser chiyungtsü abenba truck gari aika yashi Tripura tongogo.
“Yashi nungi Assam nung Lumding-Silchar section nung khu abenba train tem senzütsü tenzükogo,” ta N F Railway Chief Public Relation Officer, Pranav Jyoti Sharma-i metetdaktsü.
You must be logged in to post a comment Login