Tripura nung Hindu nunger longjemer alitsü RSS tekolakbai ajungshi

Agartala, December 18 (Agencies): Hindutva ajungkettsü nükjidong nung RSS sar sanghachalak Mohan Bhagwat-i Tripur nung aliba Hindu nunertem dang Sangh kübok longjemtsü asoshi ajungshi.
Deobarnü Agartala, Astabal Ground nung lokti den jembidang Bhagwat-i ashiba agi, Sanhg kübok Hindu nunger ajak longjemtsü nüngdaker. “Linük yanglushitsü atema na renemshitsü asoshi tesem tajungtibaji Sangh sakha Kendra dang lir,” ta pai ashiba den India yanglushitsü asoshi iba movement nung shilem agitsü asoshi ajungshi.
O jembidang Bhagwat-i ashiba agi, kuli tongtibangtibaji Hindu nunger ya tashi mait lir aser lokti ka ajanga tashi sayur.
India ya Hindu nunger lima lir, ta RSS lenir yagi Deobarnü ashiba den Hindutva ya Hindu tamangba yimsü traditional notion dang nungi balaka lir, ta shisem.
Paisa ashiba agi Hindu nunger lokti kanga junga tenteter aliba tesem tem nung India nunger longjemer nokdakogo, saka India nung Hindu nunger ajema küma aoba tesemtem nung atsüngzüka ogo.
Iba rally nung nisung aikati arua Mohan Bhagwat den ajurutepogo. Pa Tripura nung December 15 nungi mungdar aser pa December 19 nü mao tsüngda tongtibang sendentem aika akatsü asoshi atongdaka lir.