Tripura nung Hindu Sammelan ajanga tajangzük angu: RSS

Agartala, Metsüremi (March) 9 (Agencies): Yaküm Tripura nung Hindu mungdang ayongzükba ajanga nisung aika ajungmeso aser takok ngua mapa inyaktetogo ta RSS-i metetdaktsü. BJP-i Tripura nung sorkar akümba anogo nung parnoki iba osang sangoktsü.
Tanü nungi RSS senden amentsü tenzükdang Rashtriya Swayamsevak Sangh (RSS) General Secretary Bhaiyyaji Joshi-i annual report metetdaktsü aser idangji yaküm Rongjui (September) ita Tripura nung ‘Hindu Sammelan’ ayongzükba indang ashi.
“North east state tem nung Hindu Sammelan sentongtem ayongzükba aser talisa Tripura nung ayongzüka agiba ajanga lenmang aisü nung nisungtem ajungmesogo” ta RSS indang annual report nung shia lir.
Rongjui (September) 17, 2017 nü Agartala nung ayonga agiba sentong atema yaküm Aami (June) ita nungi mapa tenzük, ta RSS-isa ashi.
Iba mungdang atema lisopur telok shia den ajuruteptsü atema sentong atong aser tejaokba shiditemji tsüngdong tonga bentsür ao. Kilen shia nung saffron wako ka ka asong aser kilen lakh ka shi tonga otet, ta RSS indang report nungsa shia lir.
Iba Hindu mungdang nung Sarsanghchalak (RSS tanishir) Mohan Bhagwat-i o jembi aser Tripura kübok yimtsüng 500 dak tema nung nisung lakh aika arua aden, ta parnokisa metetdaktsü.