Tripura nung India-Bangladesh arrtsü nung Nigeria nunger ka apu

Agartala, January 29 (Agencies): Deobarnü Border Security Force (BSF)-i Tripura nung India aser Bangladesh na arrtsü ajangtsü meranga lia Nigeria nunger ka apu, saka pa den külemi aruba nisung ana mebushi jendaktsüogo, ta ketdangsertemi ashi.
“Deobar anepdang züngia Nigeria nunger asangur asem Belonia nungi Bangladesh-i aitsü meranga lia BSF patrol party-i küm 23 tain asangur ka puogo, saka pa medemsang ana jena ao,” ta BSF ketdangser Rabin Taijon-i osangbener dang ashi.
Iba asanguba BSF-i Tripura police nem agütsüogo, aser maneni police-i jena aosang ana pua arutsü asoshi bushidar.
Parnok Manipur nung football club ka nung züngsem lir, ta asangubai ashi. Parnok ket nung passport maliasü. Bangladesh-i aitsü atema parnok Kolkata nungi Tripura-i aru, ta Tiajon-i maneni shisem. Iba asanguba dang police ketdangsertemi asüngdangyadar.
Police-i ashiba agi, taoba ita asem tsüngda Bangladesh arrtsü, Belonia sub-division nung BSF purtemi Nigeria nunger asangur par 10 ozüng alema Bangladesh-i aitsü meranga lia puogo.