Tripura nung mangatettep adok; nisung 8 yiru

Agartala, Mongputeni/October 31 (Agencies): Bodhbar aonung Tripura, Sepahijala district kübok Bishalgarh jila nung shishilembadak telok ana tsüngda mangatettep adokba sülen nisung ti yiru.
Yirur alirtem mezüng Bishalgarh mozüki anir ao aser iba sülen Agartala nung GB hospital-i belener ao.
Local source ajanga ashiba agi, dokan ti rongtokogo aser ki aika arongba den mangatettep adokba mapang garia ana rongogo.
Kasa mapang nung police temi tensa azüoktsü asoshi tear gas khaloktsüba den sung agi züka merenshi.
Sepahijala district, Superintendent of Police, Krishnendu Chakraborty, additional SP Joytishman Das, SDPO aser police o TSR sepaitem aika tensa azüoktsü atema iba tesemi oa liasü.
Local temi ashiba agi, mangatettep ya aonung 7:30 ako shi nungi tenzük.
Nisung telok ana tilateri nung mangatettep adokba sülen tensa kanga mejungi aküm. Telok anaprongla ya BJP pusemertem lir.
Osang ajanga ashiba agi, Saheb Miya ta ser nisung ka aser lanur ka ana Baiderdighi Bazar nung mangatettep adok aser lanurtemi Saheb dak züka liasü.
Iba sülen mapa tatsüka lir Saheb Miya’er telok iba tesem adong aser lendong atalok. Shishilembadak aliba nisungtemia telangzüba agüja liasü.
Police temi ashiba agi, Bisalgarh nung tensa tang tajungba lir aser police o district administration-i jenjang tapet agiogo.