Tripura nung mozü shibelener ana apu

Imphal, September 25 (Agencies): Manipur police-i Tripura police teyari agia ozüng alema mozü shibelener ana apu.
Thoubal district kübok Phoudel Kierambi nung sen crore 400 alang mozütem apuba dak sendakba nung nisung anaji apu.
Tenaji Kamalpur nunger Jhutan Malakar aser Dhupirbong Krishnapur nunger Tanmoy Pal na ta jangjaogo. Tena ya South Tripura nung apu.
August 24, 2019 nü Thoubal police-i seret 400 shi touzük WY tablets aika apu aser iba mapang nisung pezü pua liasü.
Iba mozü indang jenjangji international market nung Rs 400 crore dak tema asütsü ta police ketdangsertemi ashi.
Iba ken o bushisüngdanga arudang police ketdangser asem Tripura-i ao aser idakji September 18 nü nisung ana apu. Tena ket nungi gari ka ngutetogo, ta Thoubal district Superintendent of Police, Dr S Ibomcha-i ashi.
Nisung ana yagi Myanmar nungi Silchar aser Tripura ajanga Bangladesh-i mozü shibelen ta onoki bushitet, ta Thoubal SP-isa ashi.
South Tripura nung special judge ka nungi transit remand meshiba sülen tena Hombarnü Imphal-i anir aruogo.
NDPS court-i tena October 3 tashi Thoubal police ket nung ayutsü temelaba agütsüogo.