Tripura nung Reang refugee den raradang police 7 yiru

Agartala, May 15 (Agencies) : North Tripura district nung aliba Reang refugee camp ka nung Deobarnep, idakji alirtem aser police raradang police tenet yiru.
Anogo asem tejakdang, Kanchanpur subdivision kübok Narsingpara camp nung alirtemi anameta aliba angotsübu ka nungi ango auyadang apu, aser iba ajanga mangatettep adok, ta North district superintendent of police, Manik Das-i osangbener dang ashi.
Iba mapang refugee camp nung alisang dakji angotsübu kibur aser yimdaklirtemi azük aser pa Kanchanpur hospital nung anepaluba sülen Hokolbarnü anizük, ta paisa ashi.
Ajisüaka, iba nisungji yashi timtem kar adoka mozükidangi anir aser pa tanep süngdong ka nungi süngzü agi soseta sür liasü, ta Das-isa shisem.
Pai shidi ka nung pa sasa asütsü telemtetba agir asür ta zülur tokja liasü. Ajisüaka, nisung kari paji mozükidang tepset ta olulu jembiba sülen nisung telok kati angotsübu kibur’er ki raksatsü.
Iba osang angazükba sülen police tesem tonga oa telokji azüoktsü merangdang police tenet yiru aser parnok ajak mozükidang anepaludar, ta Das-isa metetdaktsü.
Tensa azüokogo aser lendong atalokba tesem nung police aika mapa lemzüktsüogo, ta paisa ashi.
1997 küm Reang aser Mizo nunger tsüngda rara adokba sülen Reang nunger 37,000 shi ka Tripura kübok Kanchanpur subdivision nung jenoka lir.