Tripura nung ‘Rotavirus’ mozü agütsü tenzükogo

Agartala, Feb. 19 (Agencies): India nung ‘Rotavirus’ ajanga tanur lakh 10 shi shirangdaktsüogo, aser item rongnungi küm shia tanur lakh ka arishi küm pongu majungdang asür, ta Health & Family Welfare Union Minister, Jagat Prakash Nadda-i ashi.
“Rotavirus ajanga küm shia tanur lakh kaka südaktsür. Aji kümzüktsü asoshi mozü agitsü kanga tongtibang. Rotavirus mozü ajanga anojungi asüba nungi kümzüktsü,” ta Honibar nikongdang Health Minister-i Agartala, Pragna Bhawan nung ‘Rotavirus vaccination’ sentong sayatsüdang ashi.
Centre nungi ‘healthcare’ asoshi teyari agütsüba junga mamshiba asoshi mepelaba o ka Nadda-i shisem.
Haryana, HP, Andhra Pradesh aser Odisha state tem nung iba ‘Rotavirus’ mozü agütsüba sentong ya tawa tenzükogo. Health Ministry ajanga Rotavirus, Japanese Encephalitis, IPV aser Mission Indradhanush sentongtem sayaogo, ta paisa ashi.
Iba sülen pai Agartala Government Medical College, GBP Hospital aser Cancer Institute nungertem semdang.
Iba sentong nung Tripura Health Minister, Badal Choudhury aser BJP tir, Biplab Deb natia Tripura nung ‘medical college’ lapoktsü aser mozüki tem nung kiojen aser shiranger anepalutsü asoshi oset balala meshia tezüluba nung Union Minister nem agütsü.