Tripura nung sen crore 25 jenjang sandalwood apu

Agartala, February 26 (Agencies): Tripura nung BSF, forest aser police ketdangsertemi sandalwood seret 9,000 tashi puogo. Iba indang jenjang ya Rs 25 crore shi alang lir.
“Osang tejangja ka angazükba sülen ketdangsertemi Agartala tezülen Arundhutinagar nung aliba godown ka nung sandalwood ji apu” ta Border Security Force Inspector General Ashok Kumar Yadav-i ashi.
Iba dak sendakba nung nisung shinga mapu lir. Sandalwood yua aliba godown ji taoba mapang tobacco company ka indang liasü saka küm ishika tejakdang iba ya shibanga liasü.
“Yasüng apuba Sandalwood ji tajung liasü aser Rs 25 nungi 30 crore yokzüktsü. Onoki sandalwood tali jangjatsü atema Institute of Wood Science and Technology, Bengaluru aser Forest Research Institute, Dehradun dangi sample bener yokogo” ta West Tripura District Forest Officer (DFO) Shakti Kant Singh-ia ashi.
Iba godown nung sandalwood aika bendena ayuba atema bushisüngdang südar. Iba mapa inyakertem bushiteptsü tenzükogo, ta DFO-ia ashi.