Tripura nung sorkar tenzüker 300-i longkak aittsü sodi meshi

Agartala, February 26 (Agencies): Centre sorkar mapatong balala anema West Bengal, Kerala aser Tripura nungi Left party temi pusema employees’ organization-i March 2, 2017 nü Delhi nung mener longkak aittsü atema Tripura state sorkar mapa inyaker department balala nungi parnok 300-i sodi meshiogo.
Osang ajanga angazükba agi, parnok ajaki sodi meshi, ajisüaka sorkar temetetdaktsüba ka ajangabo, recognised employee’s union executive committee nung züngsemtem dak alaka longkak aittsü atema tangartemibo sodi meshitsü makok. State adena aotsü asoshi parnoki küm ka nung anogo 10 nü special casual leave agitsü akok.
Iba tensa ka nung sorkari timtem ajurur, kechiyong Delhi-i aoer parnok shilem 90 bo iba ama leave agitsü memelar. Ajisüaka peipei office nung leave application agutsür parnok ajak Delhi-i ogo.
Tanü ketdangsertem osang ka ajanga ashiba agi, office tekolaktem aikati finance department aser administrative department den iba indang asüngdangtepa liasü. Ajisüaka iba sentong ya sorkar tashi nung aliba Left party temi ayongzük asünung administration-i parnok anema kecha meinyakteter.
“Parnok timbaka February 24 nü apusoa ogo, saka Honibar-Deobar anogo sodi apir February 27 nü ang casual leave agutsü.
Sorkar mapa inyaker aikati khen nung sodi agiba ajanga office tem nung Group-C level staff tem agi anünga timtem ajurudar.