Tripura nung SSA tesayurtem anogo 4 buba lumia lungkak aiter

Agartala, August 4 (Agencies): Tripura sorkari mepishiaka Sarva Shiksha Abhiyan (SSA) tesayur 50-i mapang telatet makai lumia lungkak aitba sentong agidar.
Tanü agi anogo pezünübuba parnoki lungkak aitogo. Parnok mapa regularize süjang ta takhangba agüja SSA tesayurtemi lungkak aiter.
“Tripura sorkari onok mapa regularize mesütsü tashi onoki tanen makai lungkak aittsü” ta Tripura SSA Teachers’ Welfare Association secretary, Bastab Debbarma-i tanü osangbener dang ashi.
State sorkari aikati SSA tesayurtem mapa regularize sütsüogo. Tang onoki lungkak aitba tesem nungbo tesayur 50 dang lir saka ano tesayur 250 tashi onok pusema nungiter, ta Debbarma-isa shisem.
Iba onük atema Tripura nung opposition party tem- Congress aser Bharatiya Janata Party (BJP)-i SSA tesayurtem pusema nungiter.
Tripura Congress President Birajit Sinha, Congress MLA Ratanlal Nath aser BJP President Biplab Kumar Deb nungertemi mapang balala nung lungkak aitba tesem semdangogo aser parnoki Left Front sorkar dang SSA tesayurtem akhangba ama mapa inyaktsü tayongzükbatem agütsüogo.
“Tripura nung SSA tesayurtemji regular tesayurtem den mesüktepa itasen aser tanga facility tem angur. Sorkari kobi melii SSA tesayurtem atema EPF (Employees Provident Fund) tenzüktsütsü” ta Tripura Education Minister, Tapan Chakraborty-i osangbener dang ashi.
“Onoki tanga state tem nungi SSA tesayurtem indang osang bendenogo. State aika nung parnok regularize mesütsü. Ozü Lok Sabha MP Jitendra Chowdhury-i parliament nung iba onük benok saka Centre-i SSA tesayurtem regularize asütsü indang onük atema ola madoker” ta Tapan Chakraborty-isa ashi.
2001 nungi Tripura nung SSA ya central scheme tenzük aser iba ya Right of the Child to Free and Compulsory Education (RTE) Act 2009 mapa küma inyaktsü atema tenzükba liasü.
Tripura nung SSA tesayur 5,200 shi lir aser parnok nem regular tesayurtem ama itasen aser tanga allowances tem agüja arudar.
Ajisüaka, SSA tesayurtemi ashiba agi, tanga regular tesayurtem ama mesüi, parnok nem provident fund aser leave travel concession amala kecha magütsür.