Tripura nung tang mezüng atema VVPAT machine amshitsü

Agartala, November 7 (Agencies): Sangküm Tripura nung assembly elections agitsü aliba ama Election Commission-i voter-verified paper audit trail machines 80 bener yokogo.
Tripura nung tang mezüng atema VVPAT (Voter Verifiable Paper Audit Trail) amshitsü aser electoral roll update asüba sülen ECI-i parnok staff tem dang iba machine amshiyim sayur.
Electronic voting machines (EVM)s tim mesüi amshir ta ken o kar adokba sülen VVPATs amshitsü telemtetba agi. VVPAT ajanga vote agütsüba sülen second 7 tsüngda kuli agütsür. EVM den külemi iba machine amshitsü, ta Tripura deputy chief electoral officer, Debashish Modak-i osangbener dang ashi.
VVPATs ya India nung mezüng amshibaji September 2013 nung Nagaland kübok Noksen Assembly constituency indang bye-election nung amshi.
Iba sülen November 2013 elections nung Mizoram kübok Assembly constituency 10 nung iba machine teimba amshia liasü.
Tripura Assembly elections nung VVPATs amshitsü lemtetbaji BJP-i pelaa agizükogo.
“Uttar Pradesh elections nung EVM tim mesüi amshi ta Lef teloktemi mezüng ola adok. Tang yangi VVPATs amshitsü. Anungji, BJP-i Election Commission madak tashi amshir ta asüba ken o madoktsü. Mapa timi dang inyaktettsü” ta BJP otongdar Mrinal Kanti Deb-i metetdaktsü.
Külen, CPM state secretary Bijan Dhar-ia VVPATs amshitsü lemtetba pelaa agizükba metetdaktsü.
“Ketdangsertemi machine tasen amshiyim indang training agütsüdar. Onok telok nungi teshimtet nübotem nem tamasa iba machine amshiba reprangdaktsüdi aser iba sülen jiang onoki osang metetdaktsütsü” ta pai ashi.
Congress-ia iba inyakyim pelaa agizüker ta metetdaktsüogo.