Tripura nung taoba CPM MLA ka police-i apu

Agartala, January 10 (Agencies) : Honibarnü South Tripura kübok Amarpur nung taoba CPM MLA Manoranjan Acharjee tetsür dak tim mesüi kongshiba ken o nung aija apu.
Acharjee apuba sülen Sub-divisional judicial magistrate Sunil Singh-i pa anogo asemnü tepuokdak ayutsü aser Mongulbarnü okadaki anir arutsü atema tetuyuba agütsü.
Tang tagidak winter session nung chief minister Manik Sarkar-i Acharjee merenshitsü ta nangzükba sülen police-i pa puogo.
Iba onük atema Assembly session tenzükba anogo Hombarnü, senden junga magiteti tembang. CPM-i pa züngsem anentsüba sülen taoba ita Acharjee-i assembly nungi züngsem agien.
“Yaküm December ita tetsür tanur kati Acharjee-i la dak tim mesüi kongshi ta aitsüba ken o ka benokba sülen Amarpur police station-i pa dang anogoshia parnok nem osang agütsütsü tetuyuba agüja liasü” ta Inquiry officer DSP Meena Kumari-i ashi. Iba ken o bushisüngdangtsü atema sorkari Meena Kumari nem mapa nunglokja lir.
November 27, 2015 nü Acharjee-i CPM party office, Amarpur nung par party pusemer apuani ka den ajurutep. Iba mapang pai apuanina jala arishi küm 8 tain tanur ka Gomati ayongküm leni anir ao aser idakji la dak tim mesüi kongshi ta aitsür.
Tanutsülai lar tsürabur dang tatalokba osang ajak ashi aser ibaji CPM lennirtem dangi aben. December 10 nü CPM ketdangpurtemi Manoranjan Acharjee Agartala-i jaok aser pa telok nungi anentsü.
CPM-isa pa dang MLA menden toktsütsü tetuyuba agütsü aser iba tetuyuba ama Acharjee-i speaker Ramendra Debnath nem tezüluba ka nung menden toktsüba metetdakja liasü.
Opposition lennir Sudip Roybarman-i chief minister dang kechiba Acharjee anema FIR benoker ita ka süia pa mapur ta asüngdang aser tatem nung chief minister Sarkar-i police-i Acharjee aputsü nangzük.