Tripura nung taoba mapang Minister inyaka alir ka amokmerenba aoshi police temi bushir

Agartala, March 24 (Agencies): Taoba mapang Tripura nung minister inyaka alisang aser Trinamool Congress (TMC) lenir, Ratan Chakraborty-i Brehostibarnü BJP nung oa atenba sülen amokmerenba ajanga Police temi bushisüngdang tenzükogo.
“TMC telok nung inyaker lanur anadi Ratan Chakraborty dangi call süa amokmeren. Iba ken o bushisüngdang tenzükogo,” ta police tanishir kati ashi.
“Iba amala aibelen mapa ya metetsümonga inyakba lir, anungji aibelener aputsü asoshi obendangba bangdak nungi onoki temelaba meshiogo,” ta police temi ashi.
“Iba ama mapa inyakba ya ni police nem metetdaktsüogo aser parnoki aibelener meputetra ni Director General of Police dang ashitsü aser tapet temerenshi agütsüdaktsütsü,” ta Chakraborty-i osangbener dang ashi.
Chakraborty ya Tripura nung aliba TMC telok nung Coordination Committee mendenbuba liasü, saka pa densema züngsem 15 BJP dangi Brehostibarnü meyip. Iba sentong nung Assam BJP lenir aser Minister of State, Railway, Rajen Gohain-a aten.
1988-93 küm Tripura nung Congress teloki anir akümba sorkar nung minister inyaka liasü. “Chakraborty ama lenir aika maneni BJP dangi arutsü yimlar,” ta Tripura BJP tir, Biplab Kumar Deb-ia iba sentong nung ashi.