Tripura nung taruba sorkarji BJP-i akümtsü: Amit Shah

New Delhi, May 6 (Agencies): Honibarnü BJP President, Amit Shah-i ‘Congress aser Communists’ luja jembi aser pai ashiba agi Tripura nung taruba sorkarji BJP-i tentettsü ta ashi.
“Alima nungi Communist tem samatsüogo, India nung Congress samatsüogo aser parnokji onok den toktepertem lir. Tripura nung BJP-i taruba sorkar akümtsü” ta pai osangbener dang ashi.
BJP Tir Amit Shah-i anogo ananü atema Tripura semdanger aser sangküm state assembly elections nung Left Front sorkar atsüngdoktsü atema ‘Parivartan yatra’ sentong tenzüktsütsü. Amit-i Tripura tesüsabuba semdangbaji April 27, 2015 nü liasü.
Tripura nung Left Front-i 1993 nungi khen danga methitemi state sorkar ketdangsüa arur.
BJP-i takok nguyonga aruba atema Shah-i ashiba agi, India nung nisungtemi PM Narendra Modi-i aniba sorkar pusema nungiter ta sayua election balala nung BJP nem takok ngudakja arur.
“Nüjiso anguba sülen nisungtemi kanga sapuba nisungji Narendra Modi kümogo. State balala nung tawa election tem nung BJP-i takok anguba ajanga ibaji sayur” ta paisa shisem.
Tesüiba anogo ishika tsüngda Tripura nung BJP aser Left Front pusemertem tsüngda mepetmesü adoka raratepogo.
“BJP atema Tripura state ji kanga tongtipang, kechiyong onoki Communist den toktepba aser Northeast nung onok rashia aotsü tebilemba atema iba state ya tongtipang” ta BJP lennir kati osangbener dang ashi.
“Tripura nung BJP kanga renloker. 2013 assembly elections mapang constituency 50 nungi 47 nungbo ozü candidate temi deposit tamakok angu, saka 2014 sülen agiba election nungbo BJP-i tanabuba jenjang angu aser state nung Congress atsüngdoker opposition tongtiba aküm” ta BJP lennir Anil Baluni-i metetdaktsü.
2014 nung BJP primary züngsem 15, 000 liasü saka tang state unit nung züngsem lakh 21 jungogo, ta paisa shisem.