Tripura nung telungpur azüokogo : DGP

Agartala, January 5 (Agencies) : Yaküm Tripura nung telungpur dak sendakba lendong kecha maliasü ta police ketdangser kati metetdaktsü.
“Yaküm Tripura nung telungpur dak sendakba tatalokba kecha maliasü aser tesüiba küm 30 tashi telungpur khuret aliba kanga junga azüoktetogo” ta paisa ashi.
“Iba asoshi onoki temulung sadoka mebilemer saka tensa kanga junga mita reprangdar” ta Director General of Police K Nagraj-i osangbener dang ashi.
Tripura nungi telungpur aika Bangladesh lushi nung amenoka lir aser tang tashi nung idakji telungpur tesep 16 amenteta lir, ta paisa shisem.
“Yaküm November ita Bangladesh nung sepaitemi Tripura nunger telungpur indang tesep aika raksatsüogo. Tesep teimba ka Chittagong Hill Tracts nung liasü saka telungpurtemi iba tesem nungsa khen atema tesep kar yangluogo” ta Nagraj-isa metetdaktsü.
Bangladesh nunger lushi amshia kiralongrartemi mapa inyaktsü amai ajiteter asü koda ta osangbeneri asüngdangdang, “Tripura-i Bangladesh den kilometer 856 agi arrtsüa lir, anungji ibala lendong ataloktsü meteta mali” ta DGP- langzü.
Yaküm Bangladesh nunger nisung 1,761-i ozüng alema Tripura telungi aiitsü merang saka police-i parnok tanaben Bangladesh-i meyipa yok, ta paisa metetdaktsü.