Tripura nung TMC-i ‘anti-Left Maha Jot’ tentettsü

Agartala, April 30 (Agencies): Tripura sorkar nung tang yimsü tesüdak aliba Communist Party of India (Marxist) telok den taruba election nung tokteptsü asoshi BJP den-a matentsü saka ‘anti-Left maha jot’ mesüra tanga telok den lungjemtsü, ta Tripura nung TMC lenir, Sudip Roy Barman-i ashi.
“Asenok BJP den matentsü. Taruba election nung CPI(M) den tokteptsü asoshi ‘anti-Left maha jot’ telok ka tentettsü. BJP-i Tripura Assembly nung menden kata mangutsü,” ta Honibarnü TMC senden ka aliba mapang Barman-i ashi.
TMC nung lenir aser züngsem kar BJP dangi meyiper, ta osang angashia aruba mapang ka nung iba osang ya Barman-i sangoktsü.
Tripura nung taoba mapang TMC tir inyaksang aser Tripura Pradesh Congress Committee nung taoba tir, Surajit Datta, TMC indang Tripura unit coordination committee mendenbuba, Ratan Chakraborty aser state committee nungi züngsem 15 taoba ita BJP nung oa aten.
Barman aser Tripura nung tanga party nungi MLA tem Delhi-i oa central BJP lenirtem ajuru südi, ta TMC tetsüti aser West Bengal Chief Minister, Mamata Banerjee-i taoba hopta Kolkata nung aliba TV channel ka den osang agiba mapang ashi.
“Banerjee-i ashiba ji tai lir. Onok-i Ato Kelonser, Narendra Modi ajurua Tripura indang tebilemtsü lemsatepi ao,” ta Barman-i ashi. Saka Modi-i parnok ya majuru.
“Tripura nung TMC lenirtem aser MLA tem ajunga Kolkata-i April 21 nung TMC mungdang nung atentsü ao aser Banerjee ya maneni küm trok Trinamool mendenbula inyaktsü shimtet,” ta Barman-i ashi.
“BJP ama masü saka Trinamool Congress ya Left Front sorkar anema nokdaker telok chichiba lir,” ta TMC Tripura unit tir, Ashish Saha aser lenirtem densema alidak Barman-i ashi.
BJP ket nung sen aika lir aser item sen agitsü asoshi nisung aika iba telok nung oa atener. Saka TMC meteni telok shinga-ia Tripura nung aliba Left telok ya makoktsü, ta Barman-i ashir.
Tripura nung Assembly menden 60 asoshi election ya taruba küm February ita nung Nagaland aser Meghalaya den külemi agitsü lir.