Tripura nung train jajaba lenmang Railway Minister-i tenzüktsü

Agartala, January 24 (Agencies): Central sorkari northeast nung terenlok agütsür ta kuli sayua, Union Railway Minister Suresh Prabhu-i Agartala alema Udaipur tashi aoba train lenmang ka Mongulbarnü tenzüktsü.
Agartala nungi Udaipur atongba train lenmang tasazük kilometre 44.76 ya Prabhu-i New Delhi nungi video-conference ka ajanga lapoktsü.
“Prime Minister Modi-i northeast asoshi kanga bilemer. United Progressive Alliance (UPA)-i yimsü asüba mapang northeast nung railway atema sen crore 2,021 lemzüktsü saka taküm budget (2016-17) nung northeast nung railway atema sen crore 5,340 lemzüktsüogo,” ta pai ashi.
“Taruba ‘financial year’ (2017-18) nung ano timba kümtsütsü. Northeast tesemtem nung tebilemtsü aser tajemzük tia nung aliba ajungkettsütsü asoshi onoki akokba agi yaritsü,” ta paisa shisem.
Bangladesh, Chittagong nung aliba international sea port tonga otettsü asoshi Tripura nung arrtsülen aliba Sabroom jila nungi train lenmang ka sen crore 1,200 intoka yangluogo, ta Railway Minister-i metetdaktsü.
“Railway line Udaipur tashi yangluba ajanga Hindu nunger nüngtugu tekülemki ana- Kamakhya (Guwahati) aser Tripura Sundari temple (Udaipur) tashi train otettsü. Nia northeast ya kanga meimba yong, item northeast nung railway project tenzüka aoba reprangi aiben ogo,” ta Prabhu-i ashi.
Iba railway lapokba sentong nung shilem agitsü asoshi Tripura PWD & Health Minister, Badal Choudhury aser Transport Minister, Manik Dey nungera Agartala railway station-i ao.
2020 küm tashi nung northeast nung aliba state capital ajak den train lenmang tesendaktep yanglutsü asoshi sentong balala tenzükogo, ta Northeast Frontier Railway (NFR) nung Chief Administrative Officer, A.K. Yadav-i metetdaktsü.
Tripura aser Bangladesh tsüngda rail lenmang yanglutsü asoshi centre dang asüngdanga lir aser Myanmar den northeast train lenmang agi sendaktepba ajanga Southeast Asia indang railway tonga otettsü, ta Tripura Transport Minister, Dey-i osangbener tang ashi.