Tripura nung tribal party-i Inner Line Permit akhanger

Agartala, November 27 (Agencies): Tripura nung tribal nisungtemi akumba Indigenous Nationalist Party of Tripura (INPT)-i state Angh, Tathagata Roy dang, state nung tribal tesemtem nung tribal masüba nüburtem atema Inner Line permit densema parnoki akhangba onük 8 nung tiyongtsü aita inyakdaktsüner, ta mepishiogo.
Indigenous Peoples’ Front of Tripura (IPFT)-i tribal land Twipra Land akhangba anema INPT lenirtemi, state nung lisopurtem sobaliba wazüka aser kümzüka ayutsü atema inner line permit nüngdak, iba den külemi Tripura Tribal Areas Autonomous District Council (ADC) nem rongsenkettsüng tashi agütsütsü nüngdak, ta ashi.
Angh, Roy dang temepishiba shidi nung INPT Tir, Bijoy Kumar Hrangkhwal-i, parnoki akhangba onüktem atema December ita mezüng hopta nung party-i New Delhi, Jantar Mantar nung ghonda trok mener longka aitttsü, ta shia lir.
INPT-i akhangba onüktem rongnung Indira-Mujeev pact junga benoka inyaktsü, Assembly nung tribals atema menden shilem 50 wazüka yutsütsü,tang azükwa mongpu senden nung constitution amendment bill agi ozüng akumtsü koba ajanga ADC nem tashi agütsütsü densema lir.
IPFT-i Twipra Land temeja ka akhangba aija, Hrangkhwal-i, party-i tribal nisungtem dang yazü jembir, kechiyong parnoki akhangbatem nungji tarutsü mangdang mali, ta ashi.