Tripura nung University tasen asoshi bill agizükogo

Agartala, August 10 (Agencies): Linük nung Literacy rate tajungba (shilem 94.65) aliba state, Tripura nung Higher Education jenjang tajungba akümtsü nükjidong nung state nung University tasen ka amenoktsü atema Bill ka tanü Tripura assembly nung agizükogo.

Tang Tripura nung Central university ka aser nija University ka lir.

“State nung Higher education jenjang tajungba akümtsü nükjidong nung Tripura nung state University ka lapoktsü atema tamalen Left Front sorkari lemteta liasü. Iba nükjidong ataloktsü asoshi tang tashi nung aliba asr opposition naprongla nungi Select committee nung MLA züngsemtemi bill ka reprangshimba süklen tanü iba bill agizükogo,” ta tanü state Education Minister Tapan Chakraborty-i osangbenertem dang ashi.

“University lapoktsü atema bill ji taküm February nung benoka liaü. Saka House-i amgizükdang iba bill ji select committee ka nem tama reprangdaktsütsü asoshi benok,” ta mnister-isa ashi.

Iba bill ji Angh-i agizükba sülen Union human resource development ministry aser University Grants Commission dangi yoktsü.

State sorkari acha ayangtsü aliba university nüngjaji akhi mapang Tripura Chuba, Maharaja Birbikram Kishore Manikya Bahadur (1923-1947) nüngtem nung jaloktsütsü. Chuba Bahadur-i state nung mezüng degree college ji Agartala nung 1947 küm lapokja liasü.

Tang Tripura nung degree college 22, medical college 2, aser tanga professional den technical college 15 shi lir, aser item college tem nung kaketshir 16,000 shi lir.