Tripura nung VHP lenir Togadia-i jembiba o ashishir

Agartala, January 29 (Agencies): Agartala nung VHP lenir Pravin Togadia-i tesempa o jembiba ashishia CPI(M)-i, ozüng ajanga dangbo India nung communalism mesamatsütettsü, ta ashi.
CPI(M)-isa, Bodhbar aser Brihostibarnü na nung Togadia-i temesüzükba o jembibaji yimtenren den sentaktepa lir aser taruba assembly election tem nung BJP yaritsü atema jembiba o lir, ta aitsü.
Opposition Lenir, Sudip Roy Burman-i VHP International Working president-i minority tem anema jembiba atema pa anentsütsüla ta akhangba nung ajemdaker Tripura CPI(M) state secretary Bijan Dhar-i item o jembia liasü.
Togadia-i Muslim nunger sentoktsü aser Bangladesh nungi aitertem nem tasüba temerenshi ama temerenshi tesashiba agütsütsü jembia liasü.
Hokolbarnü The Hindu osangbenertem dang Dhar-i, “Ozüng ajanga dangbo communalism mesamatsütettsü. VHP aser RSS senteper BJP yarir. Asenoki parnok den yimtenren ajanga raratsüla,” ta ashi.
Ano külen Congress lenir Sudip Roy Burman-ia, kodaser state sorkari VHP nem lokti senden akatsü temelaba agütsü (?) ta tasüngdangba kaogo.
State BJP-ibo Togadia-i jembiba oji pa aser VHP tebilemba jembiba dang ta ashi.
“Togadia-i jembiba o dak sentakba nung onokibo, ajakji ozüng aser linük Temzüng nung aliba ama inyaktsüla ta dang ashir,” ta BJP otongdar Mrinal Kanti Deb-i ashi.

You must be logged in to post a comment Login