Tripura nung World Indigenous Day memungdaktsü

Agartala, August 9 (Agencies): Tripura nung BJP-i aniba sorkari International Day of the World’s Indigenous Peoples (IDWIP) amungtsü temelaba magütsüba anema opposition Congress-i okadak ken o ka benoktsü.
IDWIP anogomung tenüng nung Congress, Communist Party of India-Marxist indang lisopur kongsang Tripura Rajya Upajati Ganamukti Parishad (TRUGP) aser tanga teloktemi Hokolbarnü sentong balala ayongzüka agitsü renem, saka police-i temelaba magütsü.
Osang kar ajanga tensa raksatsü akok ta sangoktsüba nung ajemdaker lokti sentong kecha agitsü temelaba magütsü, ta Sub-Divisional Police Officer (SDPO Sadar) Dhruba Nath-i ashi.
“IDWIP anogo nung sentong kecha magidaktsüba anema Congress-i taruba hopta Tripura High Court nung ken o benoktsü” ta tanü Tripura Pradesh Congress President Pradyot Bikram Manikya Deb Barman-i osangbener dang ashi.
“Bharatiya Janata Party (BJP)-i aniba state sorkari lisopurtem temeten aser sobaliba kümzüka ayutsü atema international day amungtsü memelaba ya democracy anema lir” ta paisa ashi.
Külen, TRUGP President Jitendra Choudhury-ia iba mapa atema state sorkar aitsü.
Yimjung olemtep nung adenba United Liberation Front of Asom’s (Ulfa) General Secretary, Anup Chetia-i tanü Khumulwng nung IDWIP sentong nung aden.
Khumulwng ya Agartala nungi kilometer 25 shi pilar lir aser North East Indigenous People’s Forum o Tripura People’s Front-i yaritepa tanü IDWIP sentong ayonga agi.
IDWIP ya December 1994 nung UN General Assembly-i mezüng benoka liasü.
“Linük 90 nung lisopur million 370 shi ka alirtemi August 9 nü parnok sobaliba, oshioben aser inyakyim ajungkettsü atema IDWIP amunger” ta Choudhury-i ashi.
“Alima nütsüng yongsük nung lisopurtem 5% dang lir, oshi 7,000 shi jembir aser sobaliba 5,000 shi lir” ta paisa ashi.
CPI-M-i yariba Adivasi Adhikar Rashtriya Manch nung Chowdhury ya National Coordinator lir.