Tripura nungbo nashishi menoktangtsü

– Among P. Aier

Tripura state nung Bharatiya Janata Party (BJP) convenor Sunil Deodhar-i anogo ishika tejakdang   Tripura nungbo nashishi menokdangtsü kechiyong iba state nung nashishi achir aika lir ta metetdakja liasü. Tripura nung Khristan aser Muslim nunger aika lir anungji nashishi menokdangtsü ta pai shia liasü. 2014 küm Centre nung BJP-i aniba NDA sorkar akümba sülen BJP-i yimtenren mapa tongti süa inyakba rongnung nashi tepsetba aser nashishi achiba noktangba ya ka lir aser parnoki sorkar kümteta aliba state ajak nung nashi tepsetba aser nashishi achiba noktanga lir. Tripura nung BJP lennir kati nashishi indang tongti süa jembiba ajanga BJP ya Hindu tamangba yimsü nung ajemdaker inyaksangshiba telok ka ta sayur aser atangji BJP ya Rashtriya Swayamsevak Sangh (RSS) atema yimtenren kongsang lir ta kuli agütsür. BJP lennir aikati parnok telok ya secular tangatetba nung tentetba political party ka dang lir aser Hindutva tangatetba nung meinyaker aser ibaji party indang manifesto nunga zülua mali ta kulisüyonga arur, saka nashi indang onük ajanga parnoki jembiba ajakji nembangtsür. India nung lateta aliba The Prevention of Cruelty to Animals Act, 1960 nung shirurutem meimtsü aser taochi melii tepsetba noktangtsü atema ozüngtem yanglua lir aser iba nung nashi dang masü saka shiruru aika dena lir. Ajisüaka, tanü India nung Hindutva tangatetba nung tenteta aliba teloktemi nashi dak dang ametter linük ajungalen mapa inyaker aser talisa ibaji BJP sorkar kümteta aliba state tem nung tali inyakba angur. Iba denji BJP lennir karibo yimjak nung odiodia nashishi achiba mesüra tepsetba aitsür aser ‘Gau Rakshak’ tem pusema nungiter. India kübok tesem aika nung aser talisa anüdoklentip tsütsü nashi kümzükertem ta ajaba ‘Gau Rakshak’ telok meyirjang tema tentetba osang bushiteta lir. Gau Rakshak teloktemji Delhi-National Capital Region nung danga telok 200 shi tenteta lir aser item telok tulu kar nungbo nisung 5,000 jungnüa züngsema lir ta osang ajanga ashir. Item teloktem yagi nashi kümzükba tenüng nung nisung aika tepsetogo aser ano aika yirutsüogo. Anosa, kanga dang tesüngmangtsü aser taoksatsü osang kaji, Centre nung BJP-i aniba sorkari India senso shia nem 12-digit Aadhaar number agütsüba ama nashi shia nem Unique Identification number ka ka agütsütsü atema sentong yangluba ya lir. Iba ya kanga dang temenünütsü mapa ka lir aser iba ya ajanga BJP ya Hindu tangatetba nung tentetba telok ka lir ta jangjashitsür, kechiyong India nung shiruru zünger mezüngma lir aser nashi dak alia tanga shiruru indang shi-a achir. Anungji, linük nung shirurutem kümzüka ayutsü tangatetba nung ozüngtem yanglur süra, tajung saka nashi dak dang ammeter ozüngtem yangluba aser mapa inyakba yabo majung aser tangatetba shitak aliba India senso ajaki iba inyakyim anema noktaktsü tim. Aji ta süaka, asenok atema teimla ka lir aser ibaji India kübok tangalenji toktsür Northeast nunga BJP tera ayangba aser Hindu masürtem aika züngsem akümba den lennir tajungtem aika adokba ya lir. Shitakbasa BJP züngsemtemi ashiba ama, BJP ya secular party ka ta süra, Hindu nunger masüba lennirtem aser züngsemtemi iba onük nungji ammeter India nung BJP-i nashi indang politics inyakba ya anendaktsütsü atema ajungmesotsüla. Yamaji inyaktetra, BJP ya India nung political party tashi tait rongnung ka akümtsü saka nashi indang politics ya manenra, tangar sülen anishiba telok ka dang akümtsü akok.