Tripura panchayat bypolls: Menden ajak nung Congress-i tokteptsü

Agartala, Rongjui/September 03 (Agencies): Tripura state nung Rongjui 30, 2018 nü tree-tier panchayat bypoll election nung seat ajak nungi tokteptsü atema Tentonü/Monday opposition telok Congress-i sangdongogo. Metsüremi/March 9, 2018 nü nungi BJP aser IPFT (Indigenous People’s Front of Tripura) na longjemer sorkar tentetta office maparen tenzüka inyaka aoba mapang nungi panchayat nung lokti atema shimba züngsemtem timba kati resignation meshiba ajanga seat tazüngla adoka arudar.
Agartala state kübok Pradesh Congress Bhawan nung tanü Tentonü osangbenertem den senden ka amenba mapang state party lennir, Birajit Sinha-i ashiba agi, aruya aliba bypolls nung tokteptsü atema Gram Panchayat, Panchayat Samiti aser Zilla Parishad seat ajak nung Congress-i candidate tem shim tenzükogo. Candidate shimba inyakyim aser maparen ya block level tem nungi tenzüktsü.
“Onoki state indang block ajak nung party in-charge tem sangdongogo. Iba den külemi bypolls atema Congress-i party machinery renemogo,” ta Sinha-i ashi.
CPI state secretary Bijan Dhar shiba tang Delhi yimtiba nung lir, pai telephone ajanga ashiba agi, panchayat bypolls nung pai aniba party-i takok tashi agi seat timba nung tokteptsü.
“Aruya aliba bypoll election mapang ochishia, pei mulungba nem vote agütsütsü aser mepetmesü timtem kecha madoktsütsü atema onoki State Election Commission dang akhanger. Onoki takok tashi seat timba nung candidate shima toktepdaktsütsü,” ta Dhar-isa ashi.
Tang yimsü tesüdak BJP aser Indigenous People’s Front of Tripura (IPFT) pusemertemi, tashiyim amshia CPI nungi züngsemtem mapa nungi anendaktsü merangba atema CPI-i Luroi/August 20, 2018 nü parnok aitsü.
Bypoll election nung Gram Panchayat nung seat 3,207, Panchayat Samiti nung seat 161 aser Zilla Parishad nung seat 18 atema tokteptsü atema Rongjui 1, 2018 nü Tripura State Election Commissioner, GK Rao-i sangdonga liasü. State nung tebur lakh 4.04 aser tetsür 3.8 sentepa voter ajak agi lakh 7.8 lir.