Tripura Panchayat election majunger

Agartala, July 9 (Agencies): Tripura nung Panchayat election atema nomination paper agütsüba tatembangba anogo nung Sonamura nung BJP aser opposition Congress tsüngda raratep.
Congress Bhawan nung osangbener den jembidang Sonamura nungi Congress lenir tejen Bilal Mia-i BJP züngsemtem dak tai tongloktsü.
BJP züngsemtemi Congress candidate tem nomination papers magütsüdaktsü ta pai ashi.
“Congress candidate tem block aser SDM office tem nungi meindok aser nomination papers magütsüdaktsü” ta Mia-isa shisem.
Ajisüaka, BJP lennir Ratan Das-i Congress-i ashiba aija “Sonamura nung Congress-i rongrong adokdaktsü” ta ashi.
“Congress posemertemi BJP candidate aser lennirtem dak teka sangshi” ta paisa ashi.
Ano külen, Dharmanagar nung CPM züngsemtemi BJP züngsem ana züka merenshi. BJP züngsem ana rongnung kabo Panchayat elections atema candidate lir.
Yasüng Jamjuri nungi kidangi aodang CPM züngsem Parimal Das-i hadir bener pa amak ta BJP candidate Rabi Ghosh-i FIR ka benokogo.
Idangji BJP posemer Manik Das-i Rabi kümzüktsü merang saka pa dak-a teka sangshi ta FIR nungsa shia lir.
Iba tatalokba sülen BJP züngsem anaji Gomati hospital-i anir ao. Idak nung jagi Manik Das kanga mejungi yirur aliba ajanga GB hospital-i anir ao.
Rabi Ghosh ji mozü kidang nungi anizük aser pa yirua liaka nomination paper agütsü.
Tripura nung yimtenren tensa mejungi akümba atema Tripura Pradesh Congress Committee (TPCC) president Pradyot Kishore Debarma-i Chief Minister Biplab Kumar Deb dang party ajak senden ka amentsü jatepang ta ayongzükogo.
Hombar nikongtsütsü Congress Bhawan nung TPCC-i osangbener senden ka ayonga amendang Congress lennir tejentem- Gopal Roy, Pijush Kanti Biswas, Tapas Deb aser Laxmi Nag nunger den PCC President Kishore Debarma aden.
BJP yimsüsüba mapang ajuruba ama ya Democracy-i kodanga lendong majurudangi liasü, ta TPCC president Debarma-i ashi.
CM Biplab Deb-i küm asem tsüngda model state ka kümdaktsütsü ta jembir saka asangsang nungbo state ajungalen law & order mali kümogo aser Northeast nung yimtenren tensa tamajungtiba state kümdaktsüogo, ta Debarma-isa shisem.
Panchayat election atema BJP züngsemtemi opposition candidate tem nominations mesüdaktsü, ta paisa ashi.
Tripura nung tensa ya Bangladesh aser West Bengal nung atalokba mesüka lir. Nominations asüba tatembang anogo nung police ketdangsertem lia Congress Candidate tem den lennir tejentem dak teka sangshi. State kübok tesem balala nung Congress züngsem 20 tema yirua lir, ta TPCC president Debarma-isa metetdaktsü.
Tarutsü anogotem Congress-i tokteptsü. Mapang tatsüka tsüngda Congress-i opposition party aküm saka küm 25 tashi Tripura nung sorkar yimsü süa arur CPM pur küm ka tsüngda samaogo, ta paisa shisem.