Tripura: police 5 mapa nungi anentsü

Agartala, Luroi/August 21 (Agencie): Anogo pongu tsüngda Tripura nung police pongu tashi mapa nungi anentsüogo, aser parnok rongnung ana Mongolbarnü anentsü.
Police constable Pritam Bhowmik, tetsür ka den tashiyim agi medemba ken o dak sendakba nung mapa nungi anentsür Agartala CJM court dangi yokogo.
Pritam Bhowmik ya Tripura nung VIP ka indang jurila tanüker ka liasü.
Public prosecutor Bidyut Sutradhar-i ashiba agi, “arishi küm 31 tain tetsür ka August 12 aonung Agartala tezülen nisung ishikati shi nung tashiyim agi medem.”
“Pa yimti nungi pur ao aser iba sülen la den shi nung medem. Iba sülen parnoki la tepsettsü meranga liasü. Iba dak sendakba nung Srinagar police station nung ken o ka benokogo,” ta pai ashi.
Sutradhar-i ashiba agi, iba ken o dak sendakba nung Pritam Bhowmik aser Nirmal Bhattacharjee na pua Agartala CJM court-i yok aser idaka nungjiagi police dangi yok.
Deobar aonung CPI(M) züngsem Nakul Saha, Amtali police station kübok Nabin Para tesem nung tepset.
Iba dak sendakba nung Amtali police station nungi sub-inspector Maman-Ulla Kaji, Mongolabrnü mapa nungi anentsüogo, kechiyong pai pa mapa shidak minyak. Pai iba ken o bushitsüngdanga liasü.
Local temi ashiba agi, SI Kaji-i mapa shidak minyakba ajanga iba ken o nung aija alir rongnung tongtiba Sanjib Das police ket nungi jena ao.
Osang ajanga ashiba agi, traffic inspector Sukanta Biswas-a Bank manager Bodhisattva Das tepsetba ken o dak sendakba nung pua lir.
Taoba hopta sub-inspectors- Dipanjana Sinha aser Mikha Darlong nata mapa shidak minyakba atema mapa nungi anentsüogo.
Osang ajanga ashiba agi, tenati Narcotic Drugs & Psychotropic Substances (NDPS) ken o indang report mapang shidak nung magütsü.