Tripura police-i ex-chief secretary Singh aputsü

Guwahati, October 23 (Agencies): PWD nung sen crore aika alang ochimeshii amshiba ken o dak sendakba nung taoba state chief secretary YP Singh aputsü sentong lir, ta Tripura police-i metetdaktsüogo.
Police ketdangser tongti kati ashiba agi, Crime Branch-i Singh aputsü atema temzüng ozüng kübok tinyaktsü ajak tembanga inyakogo.
Tripura police-i taoba mapang PWD minister Badal Choudhury aser taoba PWD chief engineer Sunil Bhowmik nunger iba ken o nung densema aliba puteta puogo.
Sorkar ketdangsertemi ashiba agi, iba ochimashi ken o nung sen crore 600 densema lir.
Iba ochimashi ken o atalokba mapang 2008-09 nung YP Singh ya PWD principal secretary in-charge liasü.
“Crime Branch ketdangsertem telok ka Delhi-i yakta aotsü aser Singh aputsü,” ta police ketdangser kati ashi.
Taoba minister Choudhury private mozüki ka nung aliba bushiteta orr Hombar aonung puogo. Pa Agartala kübok private mozüki ka nung tang temang anepaludar.
Kasa mapang nung Choudhury-i bail atema benokba Tripura High Court nung Brehostibarnü angadangtsü akok.
Biplab Deb-i aniba sorkari Choudhury mebushitetba atema police teku mapang nungi anentsüogo aser IPS officer ka densema ketdangser trok transfer yokogo.