Tripura Police-i Nigeria nunger ka apu

Agartala, Mongputeni (October) 12 (Agencies): Yashi Agartala Railway Station nung Tripura Police-i Nigeria nunger ka Delhi-i aotsüba lia apu.
“Ni waiting room nung bendanger ka angu aser iba jagi ni pa anasa külem passenger ka ama mener tasüngdangba kar asüngdang, saka pai telangzüba magütsütet. Iba jagi ni pa dang kü indang maitsü shitakba ashi aser police ketdangser ka ama passport meshia reprang. Pa indang passport nung arishi küm 23 tain Osita Victor ta tenüng zülua liasü saka Indian visa mesüra immigration stamp kecha maliasü” ta Amtali nung Sub-divisional Police Officer (SDPO), Ajay Kumar Das-i ashi.
“Onoki pa police station-i anir arua asüngdangya asüdang pa Bangladesh yimtiba Dhaka-i aru ta ashi. October 7 nü pa Nigeria kübok Lagos nungi Istanbul, Turkey-i ao aser idak nung jagi October 9 nü pa Dhaka-i aru” ta Das-isa metetdaktsü.
Pa Dhaka nung süoshi shishilembaba mapa inyaktsü atema ao aser anogo 15 nü hotel ka nung mungzük. October 23 nü pa Dhaka nungi return ticket ka bena liasü, ta Das-isa shisem.
Pa Dhaka-i shishilembatsü atema October 9 nü tonga ao süra kechiba October 10 nü India-i arutsü? ta Das-isa ashi.
“Pa India telungi komaser aru’ar mashi aser iba nung taitsü keta lir. Pa ket nung India-i arutsüba kulikaket kecha mali” ta SDPO Das-isa metetdaktsü.
Nigeria nungertemi ozüng alema mapa inyakba ken o aika lir aser iba jagi onoki pa indang yangkhu aser julitem reprangogo, ta paisa ashi.
Pai Delhi nung nisung ka meteta lir aser pa iba nisung den ajuruteptsü atema India-i aru ta ashi. Iba jagi police-i Delhi nung nisung den tongtepttsü merang saka mesütet.
Nigeria nunger Osita Victor ji railway police ket nung agütsüogo.