Tripura sorkari sempet balaka aketertem nem kibong akümdang teyari agütsüba ajungkettsü

Agartala, May 2 (Agencies): Tripura sorkari Mongolbarnü sempet balaka aketertem (differently abled persons) kibong akümba mapang sen agi teyari agütsüba 50,000-i ajungkettsüogo, ta minister-i ashi.
Chief Minister Manik Sarkar linüsüba kübok Council of Minister tem senden ka nung sempet balaka aketertem kibong akümba mapang parnoknem sen 6,000 teyari agüja alibaji ajungkettsütsü asoshi telemtetba agi, ta Information & Finance Minister Bhanulal Saha-i osangbenertem dang ashi.
Iba teyari agütsüba ya 1986 küm nungi tang tashi nung mezüngbuba ajungketba asütsü.
2011 Census ajanga ngutetba agi, Tripura nung sempet balaka aketertem 70,000 shi lir, koba taoba mapang asadangba nungbo 57,000 dang liasü.
Tripura Pratibandhi Awdhikar Manch state Secretary Salil Debbarma-i iba mapa tajung atema Centre aser state sorkar tenüngasangba den külemi sempet balaka aketertem-i mapang talangka nungi khanga aruba madaloki aliba maparentem tem tekaraba nung reprangshia ataloktsütsü asoshi mepishe.