Tripura state nung gari lendong nung nisung timtiba asür

Agartala, January 09, 2017: Hombarnü Agartala nung 28buba ‘Road Safety Week’ benjungmung nung Tripura Trafic Police-i tsüngkang medema jajaba noksa nung angur.

Agartala, January 09 (Agencies): Tripura nung gari lendong nung nisung timtiba asür, ta Hombarnü police ketdangser kati ashi.
Director General of Police K. Nagaraj-i ashiba agi, 2015 küm Tripura nung gari lendong nung nisung ajak agi 163 asü, saka 2016 kümbo 6.75% agi ajungketer nisüng ajak agi 174 asü. Gari lendong nung 2015 küm nisung ajak agi 1,029 yiru, aser 2016 küm 853 yiru.
“Gari lendong nung nisung asübatemji khenyongi samadaktsütsüji onok nükjidong lir,” ta 28buba ‘Road Safety Week’ lapokba sentong nung police nung tekolaki ashi.
Nagaraj-i ashiba agi, linük ajunga senteper gari lendong nung lakh ka nung nisung 36 küm ka nung asür, saka Tripura nungbo küm ka nung nisung lakh ka shia nisung 4.5 asür.
Tripura nung 2010 küm sülen nungi gari tapu ajak, shilem 106.18 agi renlokogo.
“Onoki gari lendong nung nisung asüba asoshi kanga shisabulua bilemer, aser gari kümdanga anishitsü atema ajungshir,” ta police tekolakbaisa shisem.
“Sorkaria item lendongtem soittsü asoshi jenjang aika agiogo,” ta transport Minister, Manik Dey-i shisem.