Tripura tourism atema sen crore 48 agütsü

Agartala, Monupii (May) 17, 2018 (Agencies): Tripura nung tourism ajungkettsüba atema project ana inyaktsü asoshi sen crore 48 Centre-i sanction sütsüogo, ta tourism minister, Pranajit Singha Roy-i rasemnü ashi.
Iba project ana ya inyaktsü asoshi taoba hopta New Delhi nung North East Special Infrastructure Development Scheme senden nung temelaba agütsü, Singha Roy-i osang benertem dang ashi.
“Onoki project ana inyaktsüba atema benokdang. Parnoki project anaprongla agizükogo aser sen crore 48 sanction sütsüogo,” ta paisa ashi.
Mezüngbuba project atema sen crore 24.42 aser tanabuba project atema sen crore 23.40 agütsüogo. Iba fund ya Amarpur kübok Fatiksagar nungi Gomati district kübok Chabimura tesem tashi km8 talang lenmang yanglutsü asoshi aser Gomati district kübok Tirtha-mukh nungi Dhalai district kübok Raishyabari tesem tashi lenmang km20 yanglutsü asoshi agütsü.
Chabimura mesera Devatamura tasem ya 15-16 centuries AD nungi tenzüka long nung tajentu balala ajena aliba atema kanga nüngtugu lir koba Gomati ayong kümbang nung tenemtem nung lir. Iba tesem ya kanga nüngtugu eco-tourism centre ka lir. Tirthamukh kong Raima aser Sarma ayong longteper iba tesem ya temeshi tesem ka ta züngshi.
“Chabimura aser Tirthamukh nung structures aser facility kar lir, ajisüaka rongtem junga mesenzür aser lenmang majung. Onoki lenmang yanglushitsü, ayong nung rong junga senzütsüsa achaayangtsü aser tourist cottage nunger yanglua iba tesem ajungkettsü,” ta Roy-i ashi.
Minister-i ashiba agi, Left Front sorkari tourism dak sendakba nung kecha temulung agüja minyak aser iba ajanga kümtem tsüngda tourism atsüngzükogo. “Onoki tourism nung temulung agüja inyaktsü, kechiyong iba ya sen aaba lenmang tajung ka lir aser iba ajanga mapa aika adokdaktsütsü,” ta paisa ashi.