Tripura University nungi anentsüba tesayuri osangkaket office amak

Agartala, August 15 (Agencies): Tripura University nung mapa nungi anentsüba tesayur ka den medemer kati Tripura Times indang headquarters amak.
Tripura Times ya Agartala nungi adokba osangkaket ka lir.
Bodbar aonung Tripura University professor Moti Kapoor den par medemer kati osangkaket indang office amak. Parnoki video clip ka indang osang sangdongba atema iba mapa ya inyak, ta police-i ashi.
Video clip nungji Kapoor-i university indang classroom nung Karate sayuba aser ken atenba tangoka lir.
Bodbar aonung iba ya atalokli West Agartala police station nung ken o ka benok aser iba nung Kapoor den par medemer Samar Chakraborty aser mejangjatetba telok kati osangbener amakba indang shia lir.
August 14, 2019 aonung 7:00 ako meta parnoki Tripura Times office nung mapa tamajung inyak, ta FIR nungsa shia lir.
Iba mapang parnoki senior journalist Joydeep Chakraborty aser manager Soumen Bhattacharjee na dak teka sangshi.
Kapoor-i anir aruba nisungtem jagi Tripura high court nung Justice Arindam Lodh indang chamber raksatsü. Arindam-i tebu senior advocate Apangshu Mohan Lodh ket nungi iba osangkaket indang kibur senmang ngua liasü.
Iba tatalokba nung shilem agirtem aputsü atema tesem aika nung bushitepa ogo, ta West Agartala police station officer-in-charge Debaprasad Roy-i ashi.
Kapoor aser pa medemer na aputsü atema state nung police station ajak nem osang sangoktsüogo.
Tripura University nung Kapoor-i sociology sayu.