Tripura:Congress MLA trok Trinamool-i meyipogo

Agartala, June 7 (Agencies) : Tripura nung yimten yimsüsüba tsütsü Congress MLA trok tashi Mongubarnü Trinamool Congress dangi meyipogo.
Congress MLA Sudip Roy Barman den ano congress MLA asem dena arur kü nem shidi ka angütsüogo, ta Assembly Speaker Ramendra Chandra Debnath-i osangbenertem dang ashi.
“Iba shidi nung Congress MLA troki parnok Trinamool Congress nung adenba shia  lir aser parnok trok pronglai sign süa liasü,” ta Debnath-i ashi.
“Congress MLA parnok trok prong den ni kija ajurutepa parnok o angadangtsü aser shidi nung aliba sign temji parnok meyong asü masüar ibaji jangjateptsü. Kanga junga angadanga reprangshir külenang tatembang telemtetba kadangi arutsü,” ta pai ashi.
Trinamool Congress nung Tatong Tir Mukul Roy Mongulbarnü Agartala-i aru.
Left party-i yimsü asüba State-i anogo pongu tsüdang nung Mukul Roy-i anaben semdangogo.
Congress MLA trok shidi nung sign süa alirtemji Roy Barman den Ashish Saha, Biswabandhu Sen, Diba Chandra Hrangkhawl, Pranjit Singha Roy aser Dilip Sarkar nunger lir.
Assembly Speaker Ramendra Chandra Debnath nem Roy Barman-i iba shidi agütsüba mapang tang aieni oer alisang Pranjit Singha Roy aser temang manemi alisang Dilip Sarkar na ang maliasü.
West Bengal nung Congress o Left na electoral tsütsü tesentaktep kar aliba ajanga Roy Barman-i tawa ang Congress Legislature Party tanishir menden toktsü.
Roy Barman ya Tripura Assembly nung opposition lenir liasü.
Tang meden 60 agi akümba sorkar nung Congress telok nungi joko parnok nisung asemdang anünga lir.
Taoba Hombarnü-a Congress MLA Jitendra Sarkar-i Tripura Assembly toktsü aser pai Communist Party of India (Marxist) den tanaben adentsü ta ashi.
Tripura Assembly nung tesüiba mapang anaben tashi Speaker asüsang Sarkar ya congress den 2010 küm March ita nungi aden.
Item MLA trok dak ‘anti-defection law’ nung keta aliba ama inyakang, ta Tripura Congress Tir Birajit Sinha-i Speaker-ba dang shiogo.