Tripura:Kibong 600 ki makai kümogo

Itanagar, Monupii (May) 21 (Agencies): Tripura kübok tesem balala nung ghonda 24 tashi tzünglu medangi aruba ajanga tzümetsüng arua kibong 600 shi relief camp tem nung jenoktsüsa kümogo. West Tripura district, District Magistrate, Sandip Mahate-i ashiba agi, “yasüng tzünglu kanga sashia aruba ajanga Jirania sub-division, Sadar aser Agartala Municipal Corporation kübok kiyong aika nung Haora ayong lendong temaitsü agüja aliba adena atur ayimba ajanga metsüngbangogo.”
“Ayongküm nung aliba nüburtem relief camps 16 nung jenoka lir kong kibong 670 lidar. National Disaster Relief Force, Tripura State Rifles, aser Civil Defense puri nüburtem kümzüktsü asoshi maneni inyakdar anungji RC tem nung nisung timba akümtsü akok. Administration-i tajemtsü tzü aser chiyongtsü peria agütsüdar,” ta paisa ashi.
Küptoknü nungi tenzüka tzünglu kanga sashia aruba ajanga yimti nung aliba nüburtem kanga timtemdar. Kasa mapang ayong nung lendong temaitsü agüja aliba adena tzü ayim tenzükba sülen Sadar sub-division administration-i nüburtem kümdangshia alitsü asoshi tetuyuba agütsü. Tripura Minister Ratan Lal Nath aser ketdangsertemi tzümetsüng agi kongshir aliba tesem tem semdanga nüburtem den ajurutepogo. “Tenemlen tzünglu ajungbena kanga sashia aruba ajanga Balda Khal, Chandrapur aser iba den atonga aliba tesemtem tzü agi metsüngogo, kechiyong tzü Bangladesh-i sadema yimzüka maoer,” ta paisa ashi.
“Kasa mapang nung kibong aika iba tesem nungi ainshia anirogo aser ni matong tsüngda administration tonger liasü. Ketdangsertemi nüburtem timtem reprangshimogo aser iba tesem nung aliba nüburtemia teyari agütsü. Onoki iba lendong atema renema meliaka rong ajanga tekümzükba maparen inyaktsü asoshi achaayangogo,” ta pai shisem.
Osang ajanga ashiba agi, nisung meyirejang pongu dak tema parnok kiset shiruru aser oset den relief camp tem nung jenoka lir. Purnima Datta-i ashiba agi, “Anepdang nungi tzünglubo marur saka tzü tali metsünga atur. Onok kanga shisabulur aser kechi inyaktsüar memetet. Onok indang kuli kaket aser tongtibang osettem ajak kidang tokja lir aser item ya kechi koma alijar mejangja. Onoki iba amala tzümetsüng ya taoba mapang nung mongudang. Minister-i onok nem teyari ajak agütsütsü nangzükogo, anungji ata danga lidi.”
Gomati, Deo, Manu, aser Haora ayong nung tzü timba küma yimdar aser state kanga lendong nung lir. MET department, regional office ajanga taruba ghonda 24 tsüngda tzünglu maneni arutsüba sangdongogo aser district administration tem dang tensa asadanga alitsü asoshi tetuyuba agütsüogo.