Trivalent polio vaccine melena bivalent tenzüktsü

New Delhi, January 16 (Agencies): Tang agi küm pongububa India ya polio free lir aser tang trivalent version amshia aliba nungi bivalent Oral Polio Vaccine (OPV) agi melentsü sentong lir, ta tanü sorkari ashi.
National Immunization Day atongtsü anogo ka jakdang tanü Tir, Pranab Mukherjee-i 2016 küm atema Pulse Polio programme tenzükja Rashtrapati Bhavan nung tanurtem nem polio jemdaktsü.
Trivalent OPV nung wild polio type 1, type 2 aser type 3 ta tapu asemprong atema live & weakened versions lir, ajisüaka bivalent vaccine nungbo type 1 aser type 3 na dang lir.
Wild polio virus type 2 yabo alima ajaklen kokteter joko mapang talangka süia arur.
Yaküm November ita India-i immunization programme nung oral polio vaccine (OPV)  den inject sütetba Inactivated Polio Vaccine (IPV) tenzüka liasü.
Mezüngbubaren nung IPV ya Assam, Gujarat, Punjab, Bihar, Madhya Pradesh aser Uttar Pradesh state tem nung tenzük.
Tanü iba sentong nung Union Health Minister, J P Nadda-i, “Ita ishika tsüngda asenoka globally synchronized yimya nung trivalent OPV nungi bivalent OPV agi melentsü sentong lir,” ta ashi.
2016 küm atema Pulse Polio programme kübok arishi küm 5 ser tekübok aliba tanur crore 17.4 nem polio jemdaktsütsü.
“Küm pongu tashi Polio-free jenjang ya asenok atema senti lir. Tangbo India nung Maternal and Neonatal Tetanus koktetba May 2015 nung sangdongogo, alimai iba ya koktettsü atema mapang latetbaji December 2015 liasü,” ta paisa ashi.
Nadda-isa, tangbo Afghanistan aser Pakistan na nung dang polio kokteta mali, anungji alimai polio koktettsü mapang ana nung lir, ta ashi.
“Onoki kanga kümdanga miter aser ibayongji onoki maneni India den International arrtsülen polio vaccine agütsür,” ta Health Minister-i ashi.
Paisa, WHO-i tuyuba nung ajemdaker India aser linük ti – Pakistan, Nigeria, Afghanistan, Cameroon, Syria, Ethiopia, Somalia aser Kenya tsüngda senzür ainertem nem vaccine agütsütsü tuyuogo, ta shisem.