Truck garitem nung nakmati talila bener senzüba ajanga lenmang raksar

Dimapur, March 9 (TYO) : Mokokchung district nung aser talisa tenemtsünglen aliba tesemtem nung nakmati belenba truck garitem Regional Transport Authority-i lateta yutsüba touzük dang nungi talila bener senzür aser ibaji ajanga Mokokchung-Mariani lenmang densema tanga lenmangtem raksar, ta MCCI-i Mokokchung Deputy Commissioner dangi züluba shidi ka nung shia lir.

Regional Transport Authority-i truck gari ka nung 10 MTs abentsü lateta lir saka truck garitemi 15 MTs den timba abenba osang angazüker. Anungji iba dak sendakba onük asoshi tekaratiba nung mapa inyaktsü aser ano garitemi teti truck weight bridge/weigh station nung tendangtsü atema mapa inyaktsü mepishir, ta MCCI tir, Moasangba-i sangdong nung shia lir.

“Mokokchung DC-isa truck gari nung khu talila abenba indang inyakyim bushisüngdangtsü atema mepishir. Mapang shitak nung mapa inyakba ajanga gari lenmangtem kümzüka ayutsü aser iba jagi nübortem ajangzüktsü,” ta MCCI-isa sangdong nung metetdaktsü.