Trump aser Kim Jong-un na February nung tanaben ajuruteptsü

Washington, Aenjeti/January 19 (Agencies): North Korea nuclear aser missile program tem adongsatsüba dak sendakba nung US tir Donald Trump aser North Korean lenir Kim Jong-un na February tatemlen ajuruteptsü, ta White House-i sangdongogo. Lenir ana ya taoba June ita 12 nü Singapore nung mezüngbuba ajurutepa liasü.
Ajisüaka White House-i lenir ana tsüngda seden ya koba tesem nung amentsü ajibo mesangdong.
Iba osang ya Trump-i North Korea nunger lenir Kim Yong Chol den Hokolbarnü ajurutepba sülen metetdakja laisü. Iba senden nung Kim Jong-un-i par linük nuclear weapons program tem adongsatsü asoshi nangzükba minyaktetba indang jembia liasü.
Tir Trump aser Kim Yong Chol na Oval Office nung ajurutepa liasü, ta White House Press Secretary Sarah Sanders-i ashi.
“Tir Donald J Trump aser Kim Yong Chol na ajurutepa denuclearization aser tanabuba summit dak sendakba nung ghonda kaser tesadang sensaksemogo. Iba summite ya February tatemlen amentsü akok. Tir-i Chairman Kim den ajuruteptsü yongyaa atar aser iba senden amentsüba anogo mapa tatsüka lir metetdaktsütsü,” ta lai sangdong ka ajanga metetdaktsü.
“US-i denuclearization sentong tembanga minyak tashi sanction benoka atatsü,” ta laisa ashi.
“North Korea-i hostage tem chiokba aser tanga jenjang agiba nguogo aser onoki parnok dak tamang akar anungji onoki maneni iba onük nung ajemdaker sensak asemtsü. February ita iba senden nung adentsü tir yongyaa atar,” ta Sanders-i osangbenertem dang ashi.
North Korea nungi lenir Kim Yong Chol aser Secretary of State Mike Pompeo aser North Korea atema US special envoy, Stephen Biegun hotel ka nung ajurutepba sülen Kim White House-i aru.
White House nung senden tembangba sülen North Korea lenir aser pa sülen anidakertem Pompeo-i State Department, Foggy Bottom headquarters nung chiyongi jaoka liasü.
“Secretary, special representative Biegun aser vice chairman Kim nati tir Trump aser Chairman Kim Jong Un na tsüngda Singapore nung nangzüktepba tejakleni bener aotsü atema sensaksemogo. Lenirtem tsüngda senden kanga takok ngua kaogo,” ta State Department deputy spokesperson Robert Palladino-i ashi.
Taoba küm Singapore nung Trump aser Kim na otsüsütsüsa senden mezüngbuba amenba sülen Trump-i ashiba agi, linük ana tsüngda tesandaktep tajungba küma yanglushitsü aser Korean peninsula denuclearize asütsü atema tezüluba nung tenangzüktepba ka yanglutsü mulungtepogo.
US tir-isa, pa aser Kim Jong-un na senteper tebilemtsü tulu ka bentettsü aser külemi inyakba ajanga iba ya takok angutsü, ta ashi.
Singapore kübok Sentosa asetkong nung senden akaba ya linük ana tsüngda küm aika tsükchitepa arur US tir ka aser North Korea lenir ka tsüngda mezüngbuba senden amenba asütsü.
Kasa mapang nung US-i maneni Korean peninsula denuclearize asütsüba dak alaka tanga kechi magizütsü ta nenshia arudar.