Trump aser Kim na Hanoi nung ajuruteptsü

Washington, Tsüklai/February 9 (Agencies): Tir Donald Trump-i Hokolbarnü ashiba agi, US diplomats aser North Korea ketdangsertem den takok ngua senden kaogo. Paisa iba ita tatemlen North Korea lenir Kim Jong Un den Vietnam yimtiba Hanoi nung ajuruteptsü sentong aliba metetdaktsüogo. “Kü representatives tem senden takok ngua amenba sülen North Korea toktsüogo aser Kim Jong Un den tanabuba senden amentsü anogo aser mapang lemtetogo. Iba senden ya Vietnam yimtiba Hanoi nung February 27 aser 28 nü amentsü,” ta Trump-i Twitter ajanga metetdaktsü.
“Chairman Kim den ajurutepa yimjung ken o tejakleni bener aotsü yongyaa atar,” ta pai ashi.
Iba hopta tetenzüklen Trump-i Kim den tanabuba senden amentsüba anogo sangdongba den Vietnam nung akatsü ta metetdaktsü saka koba yimti nung akatsü ajibo mesangdong.
North Korea dangi US ketdangser Stephen Biegun Pyongyang nung oa taruba senden atema anogo asem tashi sensaksema liasü, ta State Department-i Hokolbarnü metetdaktsü.
Kasa sangdong ajanga ashiba agi, Biegun aser Kim Hyok Chol na iba senden mamen tsüngda ano khenbo ajuruteptsü asoshi mulungtepogo.
Bodhbarnü nungi Hokolbarnü tashi Pyongyang nung Biegun aser Kim Hyok Chol na sensaksemba mapang, Tir Trump aser Kim na Singapore senden nung denuclearization, US-DPRK tesendaktep yanglushitsü aser Korean Peninsula nung yimjung bener arutsü asoshi mulungtepba maneni tejakleni bener aotsü lemtet, ta State Department sangdong ajangasa metetdaktsü.
Honibarnü Biegun-i ashiba agi, North Korea den sensaksem kanga takok ngua tembangogo aser Hanoi nung kim den ajuruteptsü asoshi Trump yongyaa atadar.
“Tang aser tarutsü nung DPRK den mapa meranga inyaktsü kar lir,” ta Biegun-i foreign minister, Kang Kyung-wha den majurutep tsüngda South Korea nung shia liasü.
“Linük anapronglai nangzükba tem benshitetra onok tejakleni otettsü ta ni temulunglema bilemer,” ta paisa ashi.
North Korea-i nuclear weapons program toktsütsü asoshi kangabo memulungaka Trump-i tanabuba senden amentsü asoshi yongyaa liogo. Pa aser Biegun nati iba ajanga rongsenketsüng nung North Korea ajangzüktsüba lemsatepogo.
“Kim Jong Un lenisüba kübok North Korea ya Economic Powerhouse ka akümtsü, ta Trump-i tweet asü.
“Pai karbo aoksadaktsütsü akok saka pai ni maoksadaktsütsü, kechiyong ni pa den ajurutepogo aser pai kechi inyaktettsü aji ni angateta lir,” ta Trump-i ashi.