Trump den aroki lungjemer kiralongrar anema raratsü jangrar: Aziz

Islamabad, November 10 (Agencies): Pakistan linüki kiralongrar anema raratsüren nung tawa US Tir menden abentsü temeten angusang, Donald Trump den aroki lungjemer inyaktsü jangraba olen ka Pakistan foreign affairs advisor, Sartaj Aziz-i tanü, Brehostibar nü metetdaktsügo.
Par linüki US den aroki lungjemer Afghanistan nung yimtenren tebentetbaren bener arutsütsü jangraba olen ka Aziz-i shisem.
“Pakistan linüki tebendang benshia, Islamic kiralongrar telok kar anemer saka kasa mapang nung kiralongrar telok karbo pusema nungiter,” ta shia, tan Mongolbar nü agiba US Tir election nung Republican yimtenren telok nungi takok angusang, Trump-i Pakistan taoba mapang aija lir.
Ajisüaka, “Trump-i ozü Pakistan aitsübaji tesüiba tatalokba aser tangatetba lir,” ta shia, par Pakistan-i Trump den aroki lungjemer kiralongrar anema raratsü jangraba olenji Aziz-i nenshia sangoktsü.
Al-Qaeda telungpur telok den sentaktepba Islamic kiralongrartemi Afghanistan arrtsülen, Pakistan kübok densemba tribal region nung par tesepti tenteta yur, arrtsü adena kidangsüa aliba Afghanistan linük telungi iya idakji mapang shia lendong tesashi atalokdaktsüba osang bushiteta lir.