Trump den junga sensaksemogo, pa India-i jaok: PM Modi

New Delhi, January 25 (Agencies): US Tir, Donald Trump-i Ato kilonser, Narendra Modi dang, ‘India ji chichiba tembar ka lir’ ta ashiba sülen Modi-i pa India-i jaokogo.
Tanep Modi-i twitter ajanga, “Yasüng tesü Tir Donald Trump den jangratema sensaksemogo. Asen (US-India) tesentaktep taliba tashi itshitsü atema Tir Trump küna tarutsü nung külemi inyaktsü bangjemogo. India semdangtsü atema Tir Trump-a jaokogo,” ta metetdaktsü.
US Tir 45buba inyaktsü atema Donald Trump tenangzükba agiba sülen anogo pezü lir pai Modi den phone ajanga jembi. Iba ya pai (Trump) alima lenirtem pongububa den jembiba lir. Tamalen pai Russia, China aser Japan linüktem nungi lenirtem dena jembia liasü.
White House-ia, yasüng tesü alima lenir ana tsüngda shishilembaba, defence aser kiralongra onük densema onük aika jembiogo, ta metetdaktsü.
White House-isa, “Tenati South aser Central Asia nung security atema-a jembi. Tir Trump aser Ato kilonser, Modi nati alima nung kiralongra anema US aser India nati senteper raratsü bangjemogo,” ta metetdaktsü.
Iba mapang nung Trump-ia, alima nung tayongzükba balala atema US-i India ji chichiba tembar aser partner ka lir ta züngshir ta shiogo, ta White House-isa metetdaktsü.
US Tir election nüboyimba mapang Trump dang, nai takok ngura linük tesentaktep atema inyakner ta jelia jembir linük kar rongnung India aser Israel na densema lir.
Yaküm Edison, New Jersey nung Hindu-American nunger lokti tulu den jembidang Trump-i, “Trump yimsüsüba kübok asenok tembar tajung akumtsü,” ta jembia liasü.
Paisa, “Modi ji tashitait lenir ka lir, aser pa den külemi inyaksemtsü jangrar,” ta jembia liasü.