Trump-i FBI director tasen shimba Democrats temi nokdangtsü nangzük

Washington, May 16 (Agencies): US tir, Donald Trump-i Federal Bureau of Investigation (FBI) indang director, James B. Comey mapa nungi anentsüba sülen pa melen inyaktsü nübu tasen ka bushiba mapang lir. Saka Trump aser Russia tsüngda tesendaktep indang bushisüngdang asütsü atema ‘special prosecutor’ ka meshiem tashi FBI director tasenba meshiemdaktsütsü, ta Democrats teloki nangzükogo.
“Democrats nung züngsem aikati kasa bilema alitsü ni imlar. Telok nung züngsem ajak lungjemer iba onük nung telemtetba tajung ka agitsüla. FBI director ji shiba südir, ‘special prosecutor’ den tesendaktep alitsüla,” ta Senate Democratic nung lenir, Chuck Schumer-i TV news channel ka dang ashi.
Trump-i kanga ajungbena Comey mapa nungi anentsüba ajanga nüburtem kanga süngmangtepogo aser taoba US Tir election nung Russia-i Trump yari ta temolung melemi ken o benoka aliba FBI ajanga bushisüngdang asüba nung timtem agütsütsü asoshi FBI tekolakba ya mapa nungi anentsü, ta nüburtemi jembir.
Donald Trump aser Russia indang ken o bushisüngdang asütsü atema special prosecutor shimtsü ji tim lir ta White House-i majiteter, ta White House Principal Deputy Secretary, Sarah Huckabee Sanders-i May 11 nung osangbener dang shia liasü.
“Ibai nüngdak mali. Nünok den House committee, Senate committee aser Department of Justice nungi iba atema mapa inyaker,” ta Sanders-i ashi.
Deputy Attorney General, Rod Rosenstein dak telok ajaki nungita yarir aser iba bushisüngdang asütsü atema pa tetemsü, ta lai shisem.
Trump administration ajanga FBI Director, James Comey melentsü nübu pezü tenüng amshiba mapang lir. Parnokji acting FBI Director, James McCabe, Senate Majority Whip, John Cornyn, taoba mapang assistant attorney general, Alice Fisher aser New York Court of Appeals indang Judge, Michael J Garcia nungertem lir.
Comey melentsü asoshi Trump-i shimba nisung ya Senate panel dangi bener aotsü aser iba sülen vote agiteptsü asoshi Republican telok nungi timba aliba Senate-i vote agütsütsü.
“Iba special prosecutor aliba ajanga nüburtem temolung anisüngzüktsü, kechiyong, FBI director inyaksangshi reprangtsü asoshi kicha telok masüba nungi nisung ka alitsü,” ta Schumer-i Hombarnü ashi.