Trump-i Khristanpur busemba asoshi Franklin Graham-i tenüng asang

Aenjeti 22, 2018 (Agencies): Fox & Friends nung Amungnü jembiba mapang, Tir Donald Trump-i America nunger tamangba yimsü nung temeden aser tanga linüktem nung tamangba yimsü tsütsü nüji tia atema bilemtsür, ta Rev. Franklin Graham-i ashi.
“Mezüng anogo nungi pa anema nokdakaka pai mezüng küm kechi inyakogo, iba atema ni pa tenüng asanger,” ta Graham-i ashi.
“Left teloki pa samatsütsü meranger. Aser asenok ya digital coup indang tiyong nung alir ama – aser iba ya digital coup d’etat ji alitsü. Parnoki pa office nungi atsüngdoktsü meranger. Parnok kübok sorkar ayutsü meranger. Aser asenoki iba nisung asoshi sarasademtsütsüla,” ta ashi.
“Pa ya asen tir lir. Nai vote agütsür liang, magütsüi liang, pa ya tir lir. Pai takok ngutetra asenok ajaki takok angur. Pai tamakok ngura asenok ajak tamakok angur,” ta Graham-i maneni ashi.
Tawa saru ajemtsüba indang Graham-i athishia jembi.
“Iba saru ajemtsüba ajanga America nunger ajunga ajangzüktsü. Asenoki iba maongka agia pa atema sarasademtsütsüla aser pa yaritsüla,” ta pai-sa ashi.
Iba sentong nung jembiba mapang Trump-i takok anguba indanga kuli kar shisem.
“Iraq aser Syria nung ISIS madak takok anguba den sako kümogo. Iba atema asenoki pa dang tepela sayutsüla. Rongsenketsüng nung points 8,000 agi timba kümogo. Aji kanga tesüngmangtsü. Shilem 31 renlokogo. Iba ya FDR mapang nungi matalokdangba lir. Iba ajanga ajak ajangzüktsü. Na 401K ngua lira, na ajangzüker,” ta pai rasa-a ashi.
“Khristanpur ka ama asenoki inyakba mapa nung ni nungiter. Na atheist süang, Catholic süang, Protestant mesüra Jew süang. Iba nisungba nungi asenok ajak ajangzüker. Pa ya shishilembar ka lir,” ta Graham-i ashi.
“Pa ya shishilembar ka lir. Pa yimden yimsüsür ka masü aser ibaji tajung ka lir, ta ni bilemer. Yimden yimsüsür yimya nung pai masayar. Pa ya shishilembar ka lir aser pai inyakyim teraksa yanglushitsü meranger,” ta pai maneni ashi.
“Anungji Khristan ka ama ni pa busemer aser pa atema sarasademtsür. Saka iba ajanga pa ajak nung ajak ta mashir. Pa ya tabensa tir ka masü. Asenok ajak dak aliba ama pa dak tamajung lir. Saka pai iba linük yanglutsü meranger, aser iba ya kü semchirtem aser par semchirtem asoshi tajungba lir, anungji ni ashir, Tsüngremi iba nisung moajang aser asenok ajak tejakleni odi,” ta Rev. Graham-i shisem.