Trump-i Mexico den arrtsü shibangtsü amokmeren

Palm Beach (Florida), Metsüremi/March 30 (Agencies): Mexico nung ketdangsertemi ozüng alema nüburtem US-i senoka aitba nokdangtsü atema jenjang tapet magira south len arrtsü shibanga ayutsü ta tir Donald Trump-i amokmerenogo.
Iba jenjang agiba ajanga linük anaprongla rongsenketsüng dak kongshitsü, saka Trump-i ashiba agi, iba tenokdangba nung Mexico den shishilembaba ajak densema lir. Pai iba olen ya Florida nung osangbenertem den sensaksemba mapang ashi.
“Onoki arrtsü mapang talangka shibanga ayutsü,” ta paisa ashi.
Trump-i küm ana tashi ozüng alema bendanger linüki aitba nokdangtsü atema arrtsü nung jara (wall) talangka yanglutsü ta nangzüka arudar, ajisüaka Congress-i iba mapa inyaktsü atema senotsü agütsütsü memulunger. Pai taoba mapang nunga arrtsü shibanga ayutsü amokmerena aruogo, saka north len nungi nüburtem sena aruba angazükba sülen pai mapang telatet ka agütsüogo.
Iba arrtsü nokdanga ayuba ajanga arrtsü nung San Diego nungi South Texas tashi nung aliba nüburtem dak kanga mejungi kongshiba den Mexico nunger oset ayokba supermarket tem, bendenglen nungi oset belener aruba dak metaloker aliba factory tem aser US nung shishilembaba balala dak kongshitsü.
US aser Mexico na tsüngda anogo shia USD billion 1.7 alang shishilembateper, ta US Chamber of Commerce-i ashiba den arrtsü shibangba ajanga rongsenketsüng nung kanga mejungi kongshitsü aser America nunger million 5 mapa melei akümtsü ana nung lir.
Trump-i Hokolbarnü Twitter ajanga ashiba agi, “Mexico-i tangsa tang south tsütsü arrtsü nungi ozüng alema nuburtem senoka aitba menokdangra ni arrtsü shibanga ayutsü mesera arrtsü timba ka taruba hopta shibangtsü.”
“Ni taruba hopta arrtsü shibangtsü akok aser ni iba atema mesasatsü,” ta pai Florida nung ashi.
Paisa, Mexico nung aliba ketdangsertemi ozüng alema bandager US-i aitba ayonga ayonga nokdangtettsü saka parnoki onok dang nungi sen dang meshizüka agir aser mapa menyaki o dang jembir, ta ashi.
Homeland Security Secretary Kirstjen Nielsen-i ashiba agi, Mexico ajanga north leni Central American nungi kibongtem US-i aittsü merangba indang ateshia Trump-i jembiogo. Ozüng alema arrtsü atena aitertem aikati US ozüng kübok tejenokdak meshia tembanger aser iba atema tejenokdak bushirtem asoshi ozüng ajanger linüki aittsü nüngdak madoker.
Nielsen-i ashiba agi, US-i aitba tesemtem shibanga ayutsü akok. US-i aitba port tem ya official crossing point tem lir, koba commercial vehicles aser lisopurtemi amshir.
“Onoki linüki arurtem anepalutsü atema port tem shibangtsü. Anungji iba ya inyaktsü liasü, saka onok inyakyim ya tenüngdakba maparentem apir inyakba inyakyim ka lir,” ta paisa ashi. Trump-i tang agitsü aliba jenjang ajanga tayimtsü dak kongshitsü mekongshitsü ajibo White House ajanga osang kecha magütsü.
Mexico tir Andres Manuel Lopez Obrador-i tawa, par linüki takok tashi bendangertem nokdangtsü asoshi inyakdar ta ashiba sülen tang Trump-i iba olen ya shisemogo. Ozüng alema inyakertemi nisung ka Mexico adena US-i idaktsütsü asoshi USD meyirejang aika meshir.