Trump-i Muslim immigrant anema ozüng agütsüba okadaki nokdanger

New York, January 29 (Agencies) : US nung federal court kati US Tir Donald Trump-i Muslim linük tenet nungi US nung alitsü arurtem nem linük nung alitsü temeden magütsütsü tetuyuba agütsüba nokdangogo.
Brooklyn District Court-i US tesem balala nung tayimtsü anemba tesem nung bangdaker aliba refugee aika temulung pelatsüsa inyaktsüogo.
Trump-i Iran, Iraq, Syria, Somalia, Sudan, Libya aser Yemen linüktem nungi nisung ka tanga US-i maitdaktsütsü ozüng züngja lir.
Honibarnü obendanger Ann M. Donnelly-i, linük nung jenoktsü arur kar sorkar ozüng angashia koma ang mesüi meyipa aotsü aliba nokdangogo.
Tan züngtsüba ozüng nungji US nung tamalen nungi arua aliba nüburtem dak kechi inyaktsü ibajibo shia maliasü, ta osangkaket nung shia lir.
Taoba mapang linük Tir Barack Obama-i shimtetba okatsür Donnelly-i item nisungtem par linüki meyipa yokba ajanga parnoki lua marutettsüsa takoksa ajurutsü ta ashi.
Hokolbarnü sign asüa ozüng yagi linük rangben den alima ajak kanga animesüngzüktetdaktsür.
Iba telemtetba metetdaktsüba ajanga Irain nunger scientist ka Massachusetts lab-i aser Syria nunger refugee ka Ohio-i aotsü aliba den alima tesem balala nungi arurtem marutettsüsa aküm.
Iba ozüng nungji anogo 120 tashi US-i refugee ka tanga maitdaktsütsü aser Syria nungi aruba refugee tembo teti maitdaktsütsü shia lir.
Department of Homeland Security-i, iba ozüng ajanga green card bena alirtema US-i tanaben aitsü memelar, ta ashi.
American Civil Liberties Union (ACLU)-i yaria Iraq nungi aruba nisung anati Trump-i ozüng alema inyaker ta aitsüogo.
Ano linük nüburtem aika tayimtsü anenba tesemtem nung adenshir Trump-i sangdongba ozüng anema longkak aita liasü, ta osangbenertemi ashi.
ACLU tem atema okatsürtemi, nisung 100 nungi 200 tashi US tayimtsü anenba tesemtem tongli sota yua lir, ta ashi.