Trump-i nuclear tezüngzüktep meraksatsütettsü: Rouhani

Tehran, December 07 (Agencies): US Tir tasenba akümtsü temeten ngua alisang, Donald Trump-i Tir menden benokba sülen alima tashi abenba linüktem aser Iran na tsüngda agiba nuclear tezüngzüktep meraksatsütettsü ta temulung lema bilemba olen ka Iran Tir, Hassan Rouhani-i tanü, Mongolbar nü metetdaktsüogo.
Trump-i taruba 2017 küm nungi tenzüka, US Tir menden benoktsü renema lir aser pai yimsüsütsü tashi benokba sülen Iran den agiba nuclear tezüngzüktep agientsü sentong aliba osang par election nüboyimtsü sentongtem nem sangokja liasü aser iba ajanga Iran lenirtemi tebilemtsü khuret tulu benoktsü tenzüka lir.
Tesüiba mapang, 1953 küm US Tatong Tir, Richard Nixon-i par linük semdangtsü anema longkak aittsü sentong agidang University of Tehran kaketshirtem tepsetba bilemteta amongba sentong nung onük jembidang Rouhani-i tanü iba olenji sangoktsü.
“US linük ya ozü arrür linük ka lir aser ozü linük nem timtem aser tetsükdaktsü agütsütsü atema par linüki kanga meranga inyaker,” ta shia, US yimsüsürtemi tawa lemtetba ama, par Iran anema taruba küm 10 tashi tenokdangba sentong asangsang nung benokshira, par Iran-ia tapet telangzüba agütsütsü renemba olen ka pai sangoktsü.
Iran-i par tongpang nung amshitsü nuclear osettsüset yanglua rizüngtsü mapatong tenzükba sülen kasaji nokdangtsütsü nükjidong nung par linük anema 1996 küm nungi tenzüka, tenokdangba sentong benok aser iba tenokdangba sentongji maneni küm 10 agi atsünglangshitsütsü atema US yimsüsürtemi tawa lemtetogo.