Trump-i Obama’er ambassador tem nem mapang mapuloktsütsü

Washington, January 06 (Agencies) : US Tir asütsü asoshi election nung adoker alisang, Donald Trump’er teloki pa Tir mendeni atuba sülen tang aliba linük Tir, Barack Obama-i shima aliba America nunger ambassador tem parnok mapa nung mapang talila inyaktsü asoshi mapang mapuloktsütsü lemtetogo, ta osang tejangja ka metetdaktsüogo.
Iba telemtetba ya ajanga Britain, Saudi Arabia aser Japan linük tem nung ambassador tem talidak aser tanurtem school azüngba tesemtem melenshitsü kanga arisangtepdar.
Trump Tir mapa nung kanga junga mera mao tashi iba inyakyim ajanga US embassy kar nungbo ambassador melii ita ai-i alitsüsa akümtsü, ta Brihostibarnü kasa osang ajanga ashi.
Iba ama Tir melentepba mapang ambassador inyaka alirtem nem hopta mesüra ita ishishibosa parnok mapa nungi maneni inayktsü mapang agütsür, ta Politico osang ajanga metetdaktsü.
Tir Obama-i, Democratic administration mapang pai shimteta aliba ketdangsertem ajaki Trump-i shimba ketdangsertem nem takdang agütsütsü mechi January 20, 2017 tashi nung mapa nungi anentsü atema shidi zülua agüjang, ta tetuyuba agütsüogo.
Tang aliba ambassador tem nem mapang apuloktsütsü asü ta asüngdangdang Trump’er teloki, iba amalaji kecha meinyaktsü, ta State Department dang ashiba ketdangser kati Politico dang ashi.
December 21, 2016 nü nungi Trump’er teloki tang inyaka aliba ambassador tem pei mapa nungi mapang shitak nung anentsü osang agütsüogo.
Obama-i mongpu ana tashi Tir inyakba mapang Senate temeleba kübok nisung noklang aika ketdangsüba mapa atema shima liasü. Ketdangser noklang nung shilem 30 shi pai shimbatem lir aser ibaji tesüiba mapang Tir inyaka arurtemi inyakba den saku lir.
Item ambassador tem mapa nungi anenba sülen Senate temelaba kübok Trump-i nisung meshimok tashi par telok ketdangsertemi parnok mapa melenzüka atatsü.
Iba inyakyim ya ita aika nungang benteta otettsü.