Trump-i pa mulungka agi White House bener aor : Comey miim o proka tiyazü jembisang ta Trump-ia Comey aitsür

Washington, Rongchii 13 (Agencies) : US Tir, Donald Trump ya ‘mafia boss’ shibai nübur ajak dang pa akhüm tsübudaktsütsü ashi saka tesülenbo alima ajungai pa anema nokdak aser kechisarena ajak nung tiyazü dang jembi, pa dang mesüker, ta taoba FBI director, James Comey-i züluba kaket tasen ka nung shia lir.
Iba kaket nung zülua aliba nungi miimzüka agiteta US osangbenertemi sangdongba osang ka nung, Trump-i aniokba temang ayokertemi Moscow yimti hotel taktang ka nung yipden nung natzü naoktsüba atema pa kanga tip matemba video ka indanga shisema lir.
Taruba Sangtennü (Tuesday) sayatsü aliba kaket nung Comey, shiba Trump-i 2017 Monupii (May) ita nung mapa nungi anentsüogo, pai ashiba agi, US Tir ya ‘tanga tesep ka nung alir’ dang mesüker aser pai iba tesep jagi tangartem atsüa bener arutsü meranger, ta Washington Post ajanga sangdongogo.
Ano Comey-i talitapong ka ashibaji, kechi shidak mesüra tai, iba indangji Trump-i angateta mali. “Pa lenisübaji shishiba yimya dang mesüker, pai tangar dang nungi temaba ama bilemer aser pa akhümtsübudaktsüner,” ta Comey-isa shisema lir.
Pai züluba kaket tenüng agi “A Higher Loyalty: Truth, Lies and Leadership,” indangji tang White House aser Republican pur sasep nung atsüshidagi aser kaket jagi teraksa bener arutsütsüa akok ta bilemdar.
Aji oda süaka, ano tanga osang ka nung tanü Rogonü US Tir, Donald Trump-i ashiba agibo, James Comey shiba pai FBI director mapa nungi anentsü, pai tongtibang osangtem miimzüka tangar dang ashi aserbo tenangzükba agidang Congress matsüngdang tiyazü jembi anungji pa merenshitsüla.
“James Comey ya miim o sapoka ashiba nisung aser tiyazü jembir ka lir ta kuli ngutetogo. Pai mapa shidak meinyakba atema Washington nung alirtem ajaki pa mapa nungi anentsütsüla ta bilema liasü aser atangji nung ibajia atalokogo,” ta Trump-i Twitter nung shia lir.
Pa aija kaket nung zülua aliba jagi Trump kanga dang jashidar, ta kasa osang ajanga metetdaktsüogo.