Trump-i Palestine lenir Abbas White House-i jaok

Jerusalem, March 10 (Agencies) : Hokolbarnü U.S. Tir Donald Trump-i Palestine Tir Mahmoud Abbas den tan mezüngsüa phone ajanga jembiba mapang pa dang White House arua semdangtsü jaok.
“Tir Donald Trump-i Tir Abbas nem White House memunui semdanga yimtem ken o jembitsü asoshi official süa tejaokba shidi ka agütsüogo. Tena ajurutepba mapang Palestine aser Israel na tsüngda chijiba yimjung ngutettsü atema yimjung olemtep asoshi sensak asemtsü,” ta Abbas atema otongdar Nabil Abu Rdainah-i ashi.
Iba sülen Washington White House nung otongdar Sean Spicer-ia, Trump-i Abbas dang senden ka amentsü asoshi memunui White House-i arutsü jaokogo, ta ashi.
Trump US Tir akümba sülen Washington-i Israel Ato Kilonser Benjamin Netanyahu kanga sapua amshiba ngua Palestine nunger shisa bulur.
January 20, 2017 nü nungi taoba ita Netanyahu-i Washington semdang tashi nung Netanyahu aser Trump na phone ajanga anaben tashi jembiogo.
Abbas-i linük nung Israel nungeri tangar li atsünger aliba indang tongtibangser jembitsü aser iba tebilemtsü asoshi linük ana angatetteptsü nüngdak ta US dang ashitsü, ta Palestine ketdangsertemi metetdaktsü.
“Tir Abbas-i Israel tsütsü aliba tesemtem Palestine küboki aitdaktsütsü asoshi yimjung dak ajemdaker bendanga agüja inyaker,” ta osangbener kati ashi.
Trump-i Abbas dang Israel aser Palestine na tsüngda yimjung atema chitepa jembitsüla aser iba nungji US-i linük anaprong nungittsü ta ashiba White House sangdong ka ajanga metetdaktsü.
February 15, 2017 nü Netanyahu-i linük semdangba mapa Trump-i iba linük ana tsüngda yimjung atema kecha o shidang magütsüteti liasü.
“Ni linük anaprong reprangdang dang linük anaprongi aginüba ka nia aginer…,” ta Trump-i ashi.