Trump-i Paris anema jembiba Francois Hollande-i meyiptsü

Paris, February 26 (Agencies) : US Tir Donald Trump-i Paris-i manganütsü o jembiba France Tir Francois Hollande-i meyiptsüba mapang pai America Tir dang, tesendaktep tajung aliba linük ka den metetsümonga tsükchitep adoktsü o tulu mejembitsüla ta ashiba osangbenertemi metetdaktsü.
“Alima nung kiralongraba lir aser asenoki ibaji anema lungjemer raratsü. Tesendaktep tajung aliba linük ka den metetsüngmonga tsükchitep adentsü o tila kata jembibaji majung amai nibo bilemer. Nibo US den kodanga yamaji mejembitsü aser ni US Tir dang France anema yamaji mejembitsü mepishir,” ta Paris agriculture fair sentong nung Hollande-i ashiba osangbenertemi metetdaktsü.
“Ni kecha medemdanger masü, ajisüaka yangibo nüburtem nem prangpong mamshidaktsür. Yangi lokti aliba tesem nung parnok jangra atemtsü asoshi injang akhatsü atema prangpong amshir nisungtema mali,” ta pai ashi.
France yimtiba nung kiralongrartemi aiben amakba sülen Paris ji Paris memesük kümogo ta medemer Jim-i ashiba Trump-i shishiba sülen Hollande-i, Donald Trump-i item tatalokbatem terabo meima bilemtsütsüla, ta ashi.
“Ni joko Paris-i maoer. Paris ji Paris memesük kümogo,” ta Jim-i ashiba Trump-i shia liasü. Jim ya France yimtibai mapang shia aoer nisung ka liasü.
Hokolbarnü National Harbor, Maryland nung Conservative Political Action Conference nung o jembidang Trump-i “linük kümzüka alitsüji arrtsülen kümzüka ayuba nungi tenzüker” omen aser linük telungi oliorartem maidaktsüi nokdakba inyakyim nungittsü asoshi Jim-i ashiba o lepshia ashi.